Su Casteddu perdit finas in s’Olimpico de Roma contras de sa Lazio de Simone Inzaghi. Est sa de seti, in is urtimas partidas, chi is piciocus de Eusebiu Di Francesco bessint batius de su campu. A decidiri sa partida unu gol de Ciro Immobile, ca candu bit is sardus fait sempiri gol, difatis est sa de degi bortas chi segnat a su Casteddu, a innanti cun sa maglia, prena de storia, de su Torinu e a pustis cun cussa de sa Lazio. Su Casteddu no at giogua mali e antzis at tentu un’ocasioni de oru po segnai cun Marin e, a pustis de su gol de Immobile, finas cun Pavoletti e Pereiro. Imoi sa classifica s’est allonghiendu, sa scuadra de Giulini tenit a is palas feti su Parma e su Crotone e indenanti sa scuadra prus acanta, a unu puntu, est su Torino de Davidi Nicola. Dominigu chi benit atra partida dificili, custa borta cun s’Atalanta de Gasperini, ma de imoi in sus non tocat a castiai su nomini de is giogadoris chi s’atobiant: tocat a cumentzai a fairi puntus ca a nci calai in Serie B iat essi unu disisperu mannu po totu is tifosus sardus. Su campionau est ancora longu e iant a bastai duas o tres vitorias de sighiu po cambiai spetu. Cun is giogadoris nous chi funt erribaus e cussus chi ci furint giai po su Casteddu, a parrer nostu, non c’at airi perunu problema de abarrai in serie A.
La partida po comenti dd’ant giogada is casteddaius no est de ci scavulai a s’aliga e ddu narat finas Di Francesco e totu: “Non possu certu nai ca is piciocus ant fatu de totu po ndi torrai a Casteddu cun sonumancu unu puntu. Calencuna borta depiaus cicai de essiri prus artus, ma nosi dda eus giogada: eus tentu s’ocasioni po segnai a innanti de cussus e in segus finas po da paregiai. Contat meda sa conca in tempus che-i custu, e nosi serbit a binciri una partida po giogai un’atru tipu de campionau”. Imoi conca a s’Atalanta!
Màuru Mura
“Attività realizzata col contributo della Regione Sardegna – IMPRENTAS 2020-2021 LR 22/2018, art. 22”.
Foto: https://sport.sky.it/calcio/serie-a/2021/02/07/lazio-cagliari-risultato-gol
