Po cicai de cumbatiri is impestamentus de Covid in Santu Giuanni Suergiu, sa sindaga Ervida Usai at cumandau regulas noas. Massimamenti s’impestu est po is discientis de is scolas e funt gai medas is classis cundennadas a trabagliai de domu. De oi, mercuris 26 de gennargiu, finas a su primu de friargiu, benint suspendias totu is letzionis in presentzia de is scolas de sa bidda. Suspendias finas totu is atividadis de giogu, de spassiu, festas pubricas e privadas, in logu obertu o serrau.
Sa sindiga, in segus, donat ordini de suspendiri totu is atividadis sportivas, in logu obertu o serrau, massimamenti in is palestras. Proibiu finas a s’amuntonai in is presus de parcus, prassas e logus pubricus po cicai de fairi torrai su impestamentu a numurus piticus. Obrigu puru de poderai sa mascheredda finas in logus obertus in cussus logus aunia est prus facili a si atobiai cun atra genti, comenit podint essiri is frimadas de is corrieras, is intradas de is scolas o de domu de su dotori, is intradas de is butegas e in is uficius publicus.
Is butegas, is tzilleris, pitzerias e ristorantis podint oberri de is cincu de mengianu finas a is ses de merì. Si podit liai, a dogna manera, cosa de papai e de bufai, candu si bolit, de portai foras de is localis.
In su mentris su bulletinu regionali de su Covid de eriseru nos at amostau is numurus: 1.433 impestaus nous in pissu de 31.656 tamponis fatus. Si pesat de unu su numuru de chini s’agatat in terapia intensiva, imoi funt trintunu, e cussu de is atrus aposentus, trintanoi in prus e funt erribaus a trexentustrinta. In domu, incungiaus calant a 22.606.
A dolumannu si contant atru cuatru mortus: una femina de otantadus annus chi biviat in sa provincia de su Sud Sardigna, un’atra femina de otantatres annus chi biviat in sa provincia de Tatari, una femina de otantacuatr’annus de sa Citadi metropolitana de Casteddu e un’atru mortu in sa provincia de Nugoro.
26 de gennargiu de su 2022
Màuru Mura
“Attività realizzata col contributo della Regione Sardegna – IMPRENTAS 2021-2022 LR 22/2018, art. 22”
Foto: https://monumentiaperti.com/it/comuni-2/san-giovanni-suergiu/
