Atrus duxentutrintunu impestaus de su coronavirus e otu mortus in Sardigna: funt custus is numurus de su bulletinu de s’Unidadi de Crisi de eriseru. Sa nova bona est ca sa percentuali calat de s’undixi a su noi e mesu.
De martzu passau, duncas de candu est incumentzada custa pesta maladita, in s’Isula nosta eus giumpau is trintacuatrumila impestus e seus erribaus a 34.025. Is duxentutrintunu benius a campu in sa dì de dominigu funt aici dividius in su territoriu: otantotu in sa Citadi Metroplitana de Casteddu, sessantanoi in sa provincia de Tatari, trintacincu in cussa de Nugoro, binticuatru in sa provincia de Aristanis e cuindixi in cussa de Sud Sardigna.
Is mortus, invecias, bessint a otuxentustrintases. Is tamponis fatus in is urtimas binticuatr’oras erribant a 2.431 e in totu, de martzu, bessint a 510.361.
Sighint a cresciri finas is numurus de is ispidalis: funt corantotu in is aposentus de sa terapia intensiva, cincuxentudixiaseti in atrus aposentus e 16.692 incungiaus in is domus. Is numurus de aici parint sempiri maladitus, ma est giustu puru a castiai sa genti chi est sanada: eriseru, atra bella nova, funt in centuotantanoi e in totu, sempiri de martzu, funt bessius a 15.560.
Is 34.025 chi si funt amalaidaus funt aici dividius in Sardigna: 7.733 in sa Citadi Metropolitana de Casteddu, 5.565 in sa provincia de Sud Sardigna, 2.746 in sa provincia de Aristanis, 6.912 in sa provinca de Nugoro e 11.069 in cussa de Tatari.
In su fratempus, sempiri eriseru, est torrau a partiri su screening de sa genti chi bivit in Ogliastra. Andria Crisanti, dotori e babbu mannu de custu scioberu, fut in Lanusei paris a s’assessori de sa Sanidadi Mariu Nieddu e a su comissariu Massimu Termussi. Cuntentu meda est abarrau de s’arrespusta de sa popolatzioni ca po s’80 po centu est andada a si fairi controllai.
Màuru Mura
“Attività realizzata col contributo della Regione Sardegna – IMPRENTAS 2020-2021 LR 22/2018, art. 22”.
Foto: https://itacanotizie.it/2021/01/11/coronavirus-trend/
