Marcu Sanna, nasciu in Tatari in su mesi de idas de su 1969, est stetiu unu de cussus giogadoris chi de su campu ndi bessiant cun sa magligedda infusta, po sa gana e sa cursa chi poniat. Po custu est abarrau in su coru de totu is tifosus de is scuadras aunia at giogau.
De candu at cumentzau cun su Tempio, Sanna, est unu de is pagus giogadoris de fubal a airi giogau in totu is categorias professionisticas de sa serie D a sa serie A eat giogau finas in is cuatru, de is cincu, scuadras prus mannas de Sardigna: Casteddu, Torres, Tempio e Nuorese.
Po duas bortas at bintu su campionau de serie B, cun su Casteddu in su campionau 1997-98 e cun su Torinu s’annu infatu.
Cun su Casteddu at giogau po cinc’annus passendu de sa Serie C2 de Tempio a is partidas in CoppaUefa. Lassada sa scuadra de sa capitali sarda est andau a Torino e, a pustis de un’annu, est erribau a sa Sampdoria, aunia est abarrau po tres annus.
Torrau in Tatari, innoi giogat po atrus cuatr’annus erribendu a si giogai sa serie B a is play-off. De innoi andat a Nugoro aunia giogat de su 2006 a su 2009.
Abarrendu a chistionai de serie A e Serie B, Sanna at giogau po 127 bortas in sa prima e 122 bortas in sa segunda.
De su mesi de idas de su 2010 torrat a giogai in Tempio Pausania, aunia iat cumentzau de giogadori in is annus chi andant de su 1986 a su 1992. In Tempio e totu cumentzat finas a fairi s’allenadori.
De Tempio torrat in Nugoro po sighiri su trabagliu de allenadori e de sa citadi barbaricina bessit finas a Utieri. A pustis un’annu passau in sa panchina de S’Alghero, in su mesi de Sant’Andria de su 2015 benit lamau de sa Torres, chi s’agataiat in Serie D, a su postu de Ferazzoli. A s’acabu de su campionau lassat su postu a Guglielmu Bacci. Atras esperientzias de s’allenadori tataresu funt cussas cun su Grosseto, su Latte Dolce, un’atra borta a sa Torres e un’atra a sa Nuorese.
Màuru Mura
“Attività realizzata col contributo della Regione Sardegna – IMPRENTAS 2020-2021 LR 22/2018, art. 22”.
Foto: https://www.pinterest.it/pin/623115298414868485/
