S’otu e su noi de làmpadas is italianus funt lamaus a votai po torrai a fairi su parlamentu de s’Europa. At essi una torrada eletorali de importu mannu, massimamenti is partidus chi s’agatant a cumandai in Italia. Difatis s’ant a contai is votus pigaus po biri chini tenit prus poderi. A dda nai meglius, a dogna manera, non iat depiri tenni perunu problema su partidu de Giorgia Meloni. E in medas funt aspetendu is numurus de sa Lega e de Salvini.
Calencuna cosa si movit finas in Sardigna. Cincu feminas e ateretantu ominis funt is candidaus chi ant a cuncurriri po is eletzionis europeas. Custus funt po immoi ca ancora c’at duas dis po decidiri beni e ammanniai su numuru.
Sa Sardigna non currit a sa sola: is otus postus chi s’ant a pigai, in sa cida de dus de su mesi de lampadas, andant cumpartzius cun sa Sicilia, chi in sa torrada eletorali podi contai in numurus prus artus de eletoris. Sa cuntierra, a dogna modu, non est impossibili finas poita sa diferentzia manna dd’ant a fairi propriu is alliantzias intru de regionis chi is candidaus ant a sciri fraigai.
Giorgia Meloni, sa presidenti de su Consigliu de Fradis de s’Italia, at essi sa candidada de unu finas in in is duas isulas, aici comenti in atras cuatru circoscritzionis italianas, po pinnigai votus. Si pensat ca a sa sola ndi movat sonumancu su tres po centu.
Su nomini sardu de sa circoscritzioni cun sa Sicilia est lompiu de Pescara, aunia su partidu de sa Meloni s’est agatau in dd’unu atobiu de duas dis: at essi Sarbadori Deidda a provai a nci bessiri e diventai parlamentari de Strasburgo.
S’aversarius prus mannu de Fradis de s’Italia est su centru chi po sa Sardigna e sa Sicilia at postu paris Riformadoris, Fortza Italia e Nosu Moderaus. Su nomini chi ant decidiu de ponni in campu est cussu de Micheli Cossa, unu de is babais de s’insularidadi.
Màuru Mura
Lunis, su bintinoi de arbili de su 2024
Attività realizzata col contributo della Regione Sardegna – Imprentas 2023-2024. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://www.esteri.it/it/sala_stampa/archivionotizie/approfondimenti/2024/03/elezioni-europee-2024/
