Funt 6.902 is impestaus nous, de eriseru, a su coronavirus in Italia, 303 in prus de sa dì a innantis. Is mortus po curpa de su virus, invecias, funt bintidus, dus de mancu de sabudu. Is tamponis fatus, de dogna calidadi, funt 293.863 e duncas sa relata intru de impestaus e tamponis calat de unu pagheddu: 2.3% contras su 2,7%. S’agatant in 288 in is terapias intensivas chi bolit nai undixi in prus e in is atrus aposentus funt 2533, otantacuatru in prus.
In Sardigna, in su bulletinu de dogna dì donau de sa Regioni, is numurus funt custus: 414 impestaus nous in relata a 3.300 tamponis, chi bolit nai su 12,2%: dus mortus, un’omini de norant’annus de sa citadi metropolitana de Casteddu e una femina de cincuantanoi annu de su Sud Sardigna; binti ricoveraus in is terapias intensivas e centuotu in is atrus aposentus; in 6.451 s’agatant, invecias, incungiaus in domu.
De cenarba est cumentzau su cumpudu de su green pass: chini ddu fait biri de su telefoneddu o chini ddu amostat in paperi, ma ddu est finas chini morrungiat a suta sa mascherina. A parti sa fila de sa genti indenanti a is museus o atrus logus aunia serbit, non si funt tentus problemas. Arregodaus ca su green pass si depit amostai in is tzilleris e ristorantis chi funt in logu serrau, po spetaculus, cuncertus, museus, piscinas serradas, palestras e parcus po si spassiai.
Sa Fiepet, su sotziu de is ristoradoris de Confesercenti non si narat cuntenta meda: “Su Green pass est unu disisperu, massimamenti ca s’app po scansionai non funtzionat beni e po calencunu chi fait barra. Cun totu custu is mesas abarrant sbuidas. A su cumentzu a cumpudai non depint essiri is butegheris, ca giai tenint atrus problemas”.
Calencunu, a dogna manera, s’est fatu giai connosciri: in Asti un’omini de cincuant’annus, in d’unu aposentu de scumissas, est intrau chena su pass birdi e is carabineris de su Nas ddu ant multau de 400 eurus!
Màuru Mura
“Attività realizzata col contributo della Regione Sardegna – IMPRENTAS 2020-2021 LR 22/2018, art. 22”.
Foto: https://www.open.online/2021/08/07/covid-19-italia-bollettino-7-agosto/
