Dogna tanti calencunu si ndi scidat de su sonnu, narat sa sua e, a pustis, si torrat a dromiri. In Latina su leghista Claudiu Durigon, chi est finas sottosegretariu a s’Economia in su Guvernu Draghi, tenit su pensamentu de torrai a intregai su parcu de sa citadina latziali – chi imoi si lamat cun is nominis de Falcone e Borsellino – a su fradi de Benito Mussolini, Arnaldo. “Sa storia de Latina est cussa chi calencunu at bofiu cancellai, mudendu su nomini a cussu parcu chi si depit torrai a tzerriai comenti fu a innantis. Nosu ci seus e boleus sighiri custa batalla”. Durigon at nau totu custu fueddendu in su palcu de Latina, su merì de su 4 de austu. Is fueddus de su leghista ant inderetura cumentzau a girai in is social e ddu ant postu finas in su profilu “Lega Salvini Premier Lazio”.
Su parcu Comunali de Latina at cambiau nomini de s’istadi de su 2017, pighendu cussu de is dus magistraus bocius de sa mafia. Ma giai de tandu is morrungius de su centrudresta si funt allutus poita custu mudamentu andaiat contras sa storia de sa citadi.
Non c’ant postu meda a si fairi intendiri is politigus de su Parlamentu. Sa deputada de su Partidu Democratigu, Alessia Morani, at nau ca: “Sa presentzia de Durigon in su Guvernu est unu problema. Cussu chi at nau non si podit intendiri”.
Po Carmelo Miceli, sempiri de su PD, “parit una brulla, ma si cumprendit inderetura a ita serbit: in Santu Aine si depit votai po su sindigu nou e Durigon at cumentzau a cicai votus. Ddu at fatu castiendusì a una de is paginas prus legias de s’Italia. Spantosu est a ndi bolli tirai is nominis de dus magistraus chi ant donau sa vida po sa democratzia, ma su lupu perdit feti su pilu, comenti de sempiri. Durigon si frimit e dda acabit de si castiai a su fascismu”.
Ma po cuatru votus in prus si podit ponni a un’ala cussu chi est stetiu su fascismu in Italia?
Màuru Mura
“Attività realizzata col contributo della Regione Sardegna – IMPRENTAS 2020-2021 LR 22/2018, art. 22”.
Foto: http://bloglatina.altervista.org/parco-arnaldo-mussolini-giardinetti/
