Est partida de importu mannu cussa de custu merì, po su Casteddu, contras de su Genoa. Iat essi de importu ca bincendudedda is piciocus de Ranieri iant a fairi sun sartu mannu po abarrai in Serie A. Difatis, a pustis is partidas giogadas de cenarba a noti a eris a merì, sa classifica immoi bit su Casteddu a tres puntus de s’Udinese, chi oi ci iat a calai. Ma intru de mesu si ddue agatant Verona, Empoli e Frosinone. Chi est beru funt feti a unu puntu de su Casteddu, ma cun sa partida de oi si iant a podiri ponni prus a sa stesiada. Sa nova de custa giorrnonada de campionau est ca sa Salernitana c’est calada. Immoi abarrant dus postus. Unu parit chi si ddu bogliat pigai su Sassuolo. Difatis is emilianus funt fendu de totu e su lompimentu de Ballardini a pigai su postu de Dionisi no at portau cussa scintidda chi in medas creiant.
Su Casteddu est partiu po sa capitali de sa Liguria cun dd’unu atru giogadori de mancu, difatis, in s’urtimu allenamentu, cumandau de Claudiu Ranieri, s’est strupiau a su genugu Dossena. Nudda chi possat arriolai, ma s’allenadori romanu at decidiu de ddu portai in Genova: meglius a non ddu erriscai. Est de nai ca su difensori lombardu andat a s’aciungiri a is atrus giogadoris chi non podint giogai custa partida: Luvumbo chi est scualificau po una partida, Viola e Pavoletti. In prus de su casteddaiu Mancosu, ca de tempus meda est giai foras.
Intru de is giogadoris lamaus de Ranieri si torrat a incrarai Petagna, chi mancaiat de dus mesis, a pustis sa partida paregiada, in frairgiu, cun su Napoli.
Custa est sa filera de is giogadoris partius po Genova:
Portieris: Scuffet, Radunovic, Aresti;
Difensoris: Zappa, Di Pardo, Augello, Azzi, Hatzidiakos, Wieteska, Obert, Mina;
Giogadoris de mesu campu: Nandez, Deiola, Prati, Jankto, Sulemana, Oristanio, Gaetano, Makoumbou;
Atacantis: Lapadula, Petagna, Shomurodov, Kingstone.
Màuru Mura
Lunis, su bintinoi de arbili de su 2024
Attività realizzata col contributo della Regione Sardegna – Imprentas 2023-2024. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://www.dazn.com/it-IT/news/serie-b/diretta-genoa-cagliari-probabili-formazioni-e-dove-vederla-in-tv-e-live-streaming/1g4vi8rk4k1b91u4lyrsepoj7c
