Unu cumentzu chi nemus s’aspetaiat e un’erriscu mannu candu sa partida fut acabbendu, ma est galana meda sa partida de unu de s’Italia de Spalletti in is Europeus de fubalu in Germania, chi bincit contras de s’Albania po 2-1 e giogat beni po sonumancu un’ora. Sa Natzionali asula poderat massimamenti su cumandu, amostat atzionis bellas e fraigat prus de una ocasioni po fairi ancora gol. Sa tassa mesu sbuida est ca non ce dd’at fata a serrai sa partida, in sa parti de duas abbasciat tropu sa cursa e in s’acabbu de partida erriscat de pigai su gol chi iat airi donau su paregiu a un’Albania chi est parta cosa patu de aberu. In su Westfalenstadion de Dortumund, aunia in su 2006 is asulus de Lippi iant bintu sa partida a innantis de sa finali cun is meris de domu de sa Germania po 2-0, acabbat duncas 2-1 e su meglius in campu est stetiu su sardu Nicolò Barella chi at fatu su gol decisivu, a pustis chi s’Albania fut passada in vantagiu po mori de unu machiori mannu de Di Marco e dapoi chi Alissandru Bastoni iat fatu su gol de s’1-1.
Spalletti sceberat is undixi de mandai inderetura in campu e fait giogai de su cumentzu
Donnarumma; Di Lorenzo, Bastoni, Calafiori, Dimarco; Barella, Jorginho; Chiesa, Frattesi, Pellegrini; Scamacca.
S’Albania de Silvinho arrespundit cun sa matessi manera de giogai de s’Italia e mandat in campu custus piciocus: Strakosha; Hysaj, Ajeti, Djimsiti, Mitaj; Asllani, Ramadani; Bajrami, Asani, Seferi; Broja.
In su gironi de s’Italia, a innantis, sa Spagna iat bintu cun sa Croatzia po 3-0 et est parta scuadra balenti meda. At essi cun sa matessi Spagna chi is asulus ant a giogai giobia chi lompit. At essi una manera po cumprendiri chi in sa partida de custu merì est stetia meda s’Italia o tropu pagu s’Albania. Ma cun dd’unu Barella aici si podit bisai chena duda.
Màuru Mura
Sabudu, su cuindixi de làmpadas de su 2024
Attività realizzata col contributo della Regione Sardegna – Imprentas 2023-2024. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://www.calciomercato.com/news/barella-anche-litalia-ha-il-suo-fuoriclasse-ora-la-sfida-al-feno-86740
