Lompeus in s’ocidenti e precisamenti in Portogallu po chistionai de su monasteru de Albocaba. Custu esti unu monasteru medievali, chi s’agatat in sa citadi de Albocaba, in su centru de su Portogallu. Ddu at fatu nasciri e pesai su primu rei portoghesu, Arfonsu primu, in su 1153 e at sempiri tentu un’acapiu mannu cun is reis portoghesus in sa storia. Cresia e monasteru funt stetius su primu edificiu goticu de su Portogallu e, paris a su monasteru de Santa Cruz in Coimbra, est unu de is monasterus medievalis de prus importu de su Stadu. Est imbucau in is prendas de s’Unesco in su 1989,
Su monasteru de Alcobaca est unu de is primus edificius portoghesus acapiaus a s’ordini Cistercense. Comenti eus nau pagora nd’est stetiu pesau in su 1153 po arregalu a Bernardu de Chiaravalle, pagus tempus a innantis de sa morti sua, de su primu rei portoghesu Arfonsu primu, po arregodai sa vitoria contras de is Morus in Santarem in su mesi de martzu de su 1147.
Su fraigamentu de su monasteru est cumentzada in su 1178, binticinc’annus a pustis de s’erribu de is monacus cistercensi in sa regioni de Alcobaca. A su cumentzu is monacus biviant in domus fatas de linna e si funt trasferius in cussas de perda feti in su 1223. Sa cresia dd’anti acabada in su 1252. Is urtimus trabaglius a su monasteru medievali ddus ant donaus in su seculu de trexi, candu su rei Dionigi primu at cumandau su fraigamentu de su chiostro goticu, tzerriau Chiostro del Silenzio.
Is monacus ant intregau is vidas insoru a pregai, pesendu librus de importu in su scritoiu. Is monacus ant scritu unu documentu in pissu de sa storia aministrativa portoghesa dividiu in prus libburus. Sa biblioteca de Alcobaca est stetia una de is prus mannas de totu su mediuevo portoghesu, ma intru de s’invasioni francesa de su 1810 est stetia irdorrocada e libburus medas funt stetius furaus a intru is avolotus contras de su cleru de su 1834, candu is ordinis religiosus funt postus a un’ala. Is orrestus de sa biblioteca, cun centinaias de libburus medievalis, oi funt allogaus in sa Biblioteca Natzionali de Lisbona.
A intru de su Mediuevo su monasteru at tentu importu mannu. In su monasteru ddue funti finas zonas agricolas e s’abate cumandaiat in d’una zona manna. Una scola publica dd’ant oberta in su 1269. S’importu de su monasteru si cumprendit po mori ca realis medas ddus anti interraus a intru, massimamenti intru de is seculus trexi e catodixi. Rei Arfonsu ii, Arfonsu III, sa reina Urraca e Beatricd de Castiglia ddus ant interraus innoi aici comenti Perdu I e sa pobidda Ines de Castro, bocia po cumandu de su babbu de Perdu, Arfonsu IV. A pustis chi ddu ant fatu rei, Perdu at cumandau su fraigamentu de duas tumbas goticas, po issu e po sa pobidda. Oi si podinti biri a intru de sa Cresia.
A intru de su regnu de Manueli I est stetiu aciuntu un’atru pianu in pissu e una sagrestia noa, cun su stili “tardo-gotico” tzerriau stili manuelinu. Su monasteru ddu ant ammanniau in su seculu de dixiotu cun su chiostro e is torris in sa cresia, poderendu perou is partis medievalis. In su tempus barocu is monacus funt famaus po is sculturas in argidda, medas de is calis s’agatant in su retablo.
Su terremotu famau de Lisbona, in su 1755, non at fatu dannus medas in su monasteru, finas chi parti de sa sagrestia e calencunu edificiu, de pagu contu, funt stetius irdorrocaus. Is dannus prus mannus funt po mori de s’invasioni de is francesus in su 1800. In prus de su rdorobbamentu de sa biblioteca funt stetias rdorrobadas is tumbas e furadas, o abrugiadas parti de is decoratzionis de sa cresia. In su 1834 is monacus ant depiu lassai su cunventu, comenti ddi fut stetiu cumandau.
Oi su monasteru de Alcobaca est unu de is logus prus visitaus de su Portogallo.
Màuru Mura
Martis, su noi de cabidanni de su 2025
Attività realizzata col contributo della Regione Sardegna – Imprentas 2024-2025. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2024-2025. Lei Regionali 22/2018
Foto: https://www.tickets-lisbon.com/it/alcobaca-monastery-tickets/about/
