Una vida in mesu a su campu a curriri e a pigai sa bocia de is giogadoris aglienus: in pagus fueddus est custa sa storia de Franciscu Casagrande chi at giogau cun su Casteddu po cuatr’annu, de su 1976.

Casagrande, nasciu in Mareno di Piave su 2 de triulas de su 1955, benit pesau de su Vittorio Veneto, passendu poi a su Clodia Sottomarina e duncas erribat a su Monza in su 1975. De sa scuadra brianzola ddu comporat su Casteddu, chi tandu s’agataiat in Serie B. Famau finas po is pilus longus e is mutatzus, Franciscu giogat in Sardigna 120 partidas fendu 10 gol, chi po unu chi pensaiat a innantis a ndi furai sa bocia a is atrus non funt pagus. A pustis sa maglia de is sardus bestit cussa de sa Fiorentina, Sa Sampdoria, su Como, su Padova e serrat sa carriera sua in Bergamo cun su Virescit. In totu in sa Serie A giogat 182 partidas e po 13 bortas fait gol.

Acabau de giogai, cumentzat a trabagliai comenti de allenadori, massimamenti cun is giovunus de sa Sampdoria, aunia sighit is Giovanissimi Regionali e duncas cun is piciocheddus de s’Angelo Baiardo, Vazzolese e su Mareno Gialloblu, de su 2013 finas a ocannu passau.

Casagrande est stetiu unu de is primus italianus a si pigai cura de Maradona, candu giogaiat cun sa Fiorentina, in d’una partida intru de amigus contras de s’Argentina in su mesi de austu de su 1981. “Una partida bella, su stadiu de Firenze fut prenu de genti e finas chi non fut una partida uficiali deu, comenti de sempiri, apu fatu de totu po frimai a Diegu. Tengiu un’arregodu galanu de su campioni argentinu e depu nai ca a ddu frimai candu teniat sa bocia fut dificili meda, ia cumprendiu ca tocaiat a fairi de totu po no ddi fairi erribai sa bocia. In segus ddu apu torrau a agatai in Serie A, ma non fut su solu campioni chi giogaiat tandu de nosu, comenti feus a si ndi scaresciri a Platini, Zico o Falcao?”.

Franciscu at sempiri nau de airi lassau su coru in dogna logu aunia at giogau: “Ma in Casteddu, aunia apu giogau de prus, tengiu arregodus bellus a beru. Is sardus funt unu populu mannu de coru e de conca, dogna borta chi gioghiaus in domu fut unu spantu, su Sant’Elia faiat a timiri”.

 

 

Màuru Mura

 

 

“Attività realizzata col contributo della Regione Sardegna – IMPRENTAS 2020-2021 LR 22/2018, art. 22”.

 

 

Foto: https://www.enordest.it/2021/02/14/francesco-casagrande-una-vita-da-mediano/