In su fratempus chi in Sardigna is impestaus a su Covid funt sempiri de prus (est a nai ca in is primas otu dis de austu ant giumpau is 2006) si provat a cunvinciri totu cussus chi tenint prus de cincuant’annus a si fairi su vacinu. In s’Isula funt cuasi centutrintamila chi tenint prus de cincuant’annus chi ancora, po calencuna arregioni, no ant fatu su vacinu. Sa Regioni e s’Ats, duncas, ant scritu a is dotoris de is biddas e de is citadis po ddus cumbidai a cumbinciri custa genti e po sciri su poita funt contrarius.
Sa spera est chi a intru de s’acabu de cabidanni is sardus erribint a s’80% de vacinaus.
Eriseru, aici narat su bulletinu regionali funt 303 is impestaus nous in pissu de 2554 tamponis, cun sa percentuali chi calat, ma pagu, a su 11,9%. A dolu mannu teneus unu mortu puru, un omini de otant’annus chi biviat in sa citadi metropolitana de Casteddu. Cun cust’urtimu imoi is mortus de su cumentzu de sa pesta, de su mesi de martzu de su 2020, bessint a 1.514.
Sighit a bessiri finas su numuru de chini s’agatat in terapia intensiva: imoi funt bintidus. Unu in prus finas in is atrus aposentus de is spidalis: a oi funt centunoi. Incungiaus in domu, invecias, funt in 6.548.
In totu s’orrestu de s’Italia 5.432 funt is impestaus nous in pissu de 203.511 tamponis, cun sa percentuali chi bessit a su 2,8% contras su 2,3% de sa di a innantis. Dexi is mortus, prus pagu de sa metadi de sa dì de cenarba. Atrus binticuatru imbucant in is terapias intensivas e imoi in totu s’Italia funt 299, e in is atrus aposentus si ddue agatant in 2.631.
De su cumentzu de sa pesta funt 4.396.417 is impestaus in Italia cun 128.220 mortus e 4.155.931 sanaus. Is italianus malaidus de Covid a oi funt 112.266.
Su peus depit ancora erribai o ddu eus giai biviu? A parrer nostu feti cun su vacinu podeus torrai a biviri comenti de prima!
Màuru Mura
“Attività realizzata col contributo della Regione Sardegna – IMPRENTAS 2020-2021 LR 22/2018, art. 22”.
Foto: https://quifinanza.it/editoriali/fotonotizia/vaccino-covid/516269/
