Corpus de pistola e timidura in prena dì in Manhattan, in su coru de New York, in dd’unu palatzu aunia a intru ddu at paricias sociedadis finantziarias. Intru de custas Blackstone, su prus mannu de su mundu. Cuatru is personis mortas, intru de custus unu agenti boddiu a sa schina e mortu a pustis s’erribu in su spidali. Mortu finas cussu chi sparaiat, chi po immoi est connotu comenti unu omini arvu de bintiset’annus chi biviat in Las Vegas. Est de nai ca, po s’ora, non si connoscit s’arregioni

Totu est cumentzau biora de is ses de mericeddu, candu in Italia fut mesunoti, in su a intru de su palatzu (chi s’agatat in su 345 Park Avenue, intru de su caminu 51 e su 52: unu palatzu artu cuasi duxentus metrus aunia ddue funt, intru de medas, sa National Football League, sa Kpmg e sa sociedadi imobiliari Rudin Management.

Comenti amostant is imaginis de sa Cnn, un’omini cun uglieras scuriosas, crapitas sportivas, pantalonis nieddus, giachigedda asula comenti de sa camisa, si acostiat bia s’intrada. Po cussu chi narat su New York Post su piciocu teniat finas unu giobotu “antiproiettile”. In sa manu dereta tenit unu fosili chi assimbigliat a unu AR-15 o Ak-47. S’omini fait in tempus a bessiri finas a su pianu de trintadus o trintatres bocendu sonumancu cuatru personis. In su pianu de trintatres, aunia ddu ant agatau mortu, si ddue agatant finas is uficius de sa Rudin. Forsis sciat eita depiat fairi e si boliat vendicai, ma po imoi funt totu pensadas chi non lompit a perunu logu.

Su sindigu de sa citadi prus famada de is Stadus Unidus, Eric Adams, at scritu in X, cumbidendu is citadis de sa Mela Manna a non bessiri chi s’agataiant in is orus de Park Avenue e East 51st Street. In pag’ora sa politzia at ingiriau su palatzu, finas cun s’agiudu de unu elicoteru. Ma, no est serbiu a nudda, poita s’mini, po cussu chi si narat, s’est bociu a manu sua etotu.

 

 

 

 

 

Màuru Mura

 

 

 

Martis su bintinoi de triulas de su 2025

 

 

Attività realizzata col contributo della Regione Sardegna – Imprentas 2024-2025. Legge Regionale 22/2018

 

 

Ativadi apariciada cun s’agiudu de sa Regioni Sardigna – Imprentas 2024-2025. Lei Regionali 22/2018

 

 

Foto: https://lavocedinewyork.com/new-york/2025/07/29/strage-di-manhattan-sono-cinque-i-morti-nel-mirino-cera-la-nfl/