Non fueddat perunu giogadori de su Casteddu a pustis sa partida perdia po 2-0 cun s’Empoli, ma a chistionai cun is giornalistas si presentat su presidenti Tomasu Giulini. “Soi innoi poita mi dispragit meda de averas, est giustu chi siat sa sociedadi a ci ponni sa faci”, narat Giulini, chi sighit: “A pustis airi pigau cuatru gol de su Napoli, oi a pustis su gol de dus de s’Empoli nosi seus scagliaus comenti de su nì in su soli e non depit mai sussediri”.

Su presidenti si ponit in duda issu etotu: “Forsi su problema soi deu. In custus annus eus sempiri agatau is crais, finas dapoi de Venetzia candu ci seus calaus in serie B, ma oi in cust’ora non dd’as biu e mi pregontu su poita. Apu erriciu meda, in custus annus, e donau su matessi, forsis immoi soi deu chi non soi donendu. Sa prima pregunta dda depu fairi in pissu miu. Chi seus in custa situatzioni ap’airi faddiu in calencu sceberu, ma ancora non ddu cumprendu aunia apu sbagliau in s’istati passada”.

Una bia acabbada sa partida Giulini at inderetura chistionau cun Nicola: “Nosi seus chistionaus a innantis, dd’apu nau ca custu merì mi intendia in doveri de nosi scusai cun is tifosus. Dispagit meda a mei, ma a totu sa genti de su Casteddu: dd’apu nau chi bolia chi a fueddai fessit feti deu, invecias c’at bostu ponni sa faci finas issu. Dd’apu nau ca depit agatais is crais po ndi bessiri de custa situatzioni e ca airi agradessiu chi de cras sa scuadra s’agatit a sa sola e paris a Nicola e a Bonato eus decidiu de aici. Ant essi issus etotu a decidiri finas a candu”.

Is fueddus de su presidenti funt crarus: “Sa genti nosta s’aspetat calencuna cosa de diversu. Est giustu chi sia innoi a nai ca nosi dispragit meda po sa partida chi eus fatu. Teniaus in conca de cumentzai meglius meda ocannu, fians poita teniaus cuatru partidas in domu intru de cincu, invecias eus pigau feti dus puntus e lompeus de tres partidas perdias una defatu a s’atra”.

 

 

 

 

Màuru Mura

 

 

 

Sabudu, su bintunu de cabidanni de su 2024

 

 

Attività realizzata col contributo della Regione Sardegna – Imprentas 2023-2024. Legge Regionale 22/2018

 

 

Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018

 

 

Foto: https://www.youtube.com/watch?v=ALBmZ2-ng88