In sa Natzionali de fubal de Mancini, chi at bintu is Europeus s’undixi de su mesi passau in Wembley, ddue funt dus giogadoris sardus chi, a pustis sa vitoria, si funt fatus tirai una fotografia cun sa bandela sarda de is bator moriteddos. Cenarba, atrus dus sardus, mancari unu feti cun su sanguni de su babbu, Larentu Patta e Filipu Tortu ant spantau su mundu, paris a Desalu e Jacobs, bincendu sa stafeta 4×100 in is Olimpiadis giaponesas de Tokyo 2020 e non si ndi funt scarescius de sa terra insoru.

Su gadduresu, de origini est a nai, Filipu narat sa sua in Instagram e s’oristanesu Larentu Patta fait su matessi intreghendu sa vitoria a sa Sardigna: “Fortza Sardigna – si ligit – custa medaglia de oru est, massimaenti, po bosatrus”.

Ma a essiri sardus est a beru un’atra cosa o seus nosu a nosi dda cantai e baddai? Is ominis sardus e is feminas sardas mai si ndi  scarescint, candu chistionant cun giornalis e televisonis, sa terra insoru e cicant sempiri de arregodai de aunia erribant. Bortas meda parit ca non serbint is fueddus, invecias a parrer nostu custus non funt de ci scavulai a s’aliga!

Tortu e Patta, is campionis chi ant fatu erribai sa Sardigna aunia mai nemus ci fut arrennesciu, non si ndi funt scarescius de cussu chi est sussediu in is urtimas dis in s’Isula e is fueddus insoru parint durcis che su meli: “A totu is sardus chi ant sunfriu in su biri sa terra galana de Sardigna, su trabagliu de una vida, is campus, su bestiamini totu abrugiau. A bosatrus, populu sardu, intregaus custa allirghia pitica, chi bosi possat serbiri po su dolu mannu chi eis tentu in custas cidas de inferru”. Su pensamentu est po totu is fogus in su Montiferru, cun bintimila etarus abrugiaus, e chi est erribau finas a s’Ogliastra.

Totu sa Sardigna s’est allirgada po Tortu e Patta, ca sa 4×100 de s’atletica est una de is garas prus famadas e sa medaglia binta balit meda a is ogus de totus.

 

 

 

Màuru Mura

 

 

“Attività realizzata col contributo della Regione Sardegna – IMPRENTAS 2020-2021 LR 22/2018, art. 22”.

 

 

Foto: https://www.oasport.it/2021/08/atletica-lorenzo-patta-sono-al-settimo-cielo-unaltra-medaglia-doro-portata-in-italia/