“Soi cuntentu de torrai in Sardigna, ci bengiu de trint’annus a imoi e mi soi agatau sempiri beni”. Funt is priimus fueddus de s’allenadori nou de su Casteddu Walter Mazzarri, erribau eriseru in s’aeroportu de Su Masu.

Ingiriau de is giornalistas, in su mentris chi ndi bessiat de s’aeroportu, at nau ca at a chistionai de prus a innantis de sa partida de dominigu cun sa Lazio. Po s’ora at fueddau de is arregodus chi tenit de Casteddu, candu in su 1982 teniat in pissu sa maglia de giogadori: “Finas chi feti po cuatru mesis, candu fui unu piciocheddu, funt galanus meda”,

Po su benidori: “Fueddus pagus, depit chistionai su campu”, at nau issu, chi in Sardigna at giogau finas cun sa Torres in su 1994-95. A pustis est intrau in sa machina, fata erribai de su Casteddu, po andai in Asseminello po cumentzai inderetura a trabagliai.

S’allenadori toscanu at cuncordau cun Tomasu Giulini de abarrai in Sardigna finas a su 30 de lampadas de su 2024. Cun Mazzarri in Casteddu funt erribaus finas s’allenadori in segunda Claudiu Bellucci, su preparadori Giusepu Pondrelli, s’agiudu tecnicu Claudiu Nitti e su “match analyst” Cristian Guerrini.

Cambiu duncas intru de toscanus in sa panchina de su Casteddu, unu livornesu a su postu de unu toscanu, cussu Lionardu Semplici, omini cun sa schina ereta, chi at pagau custas tres partidas legias de su cumentzu de su campionau. De arregodai ca candu fut erribau, su Casteddu teniat unu pei e mesu in Serie B, cun conca, coru,gana e coru Semplici ce dda iat fata a sarvai sa scuadra, ma in su mundu de su fubal, duas o tres partidas mudant totu. A dogna manera, Semplici, nd’est bessiu de sennori, torrendu gratzias a totus.

Imoi tocat a fairi chistionai su campu, Mazzarri est unu capassu, forsis no est geniosu, ma de seguru est unu chi de fubal ddi massiat meda.

Si chistionat de unu milioni de euro chi dd’at intrai in buciaca po ocannu: no est pagu!

 

 

Màuru Mura

 

 

“Attività realizzata col contributo della Regione Sardegna – IMPRENTAS 2020-2021 LR 22/2018, art. 22”.

 

Foto: https://www.calciomercato.com/news/cagliari-mazzarri-fumata-bianca-i-dettagli-52324