Tres partidas, duas perdias e una paregiada, funt bastadas a su presidenti de su Casteddu Tomasu Giulini a decidiri de cambiai allenadori: Semplici postu a un’ala e parit chi erribit Walter Mazzarri.
Est giustu? No est giustu? Si depiat fairi? De seguru Giulini est scaddau de ocannu passau candu a Di Francesco dd’iat donau fidi finas a candu non ce dd’at fata prus. Ma, galu prus seguru est chi nosu non connosciaus calencuna cosa: forsis ant certau o forsis is giogadoris ant pistau meda po su mudamentu in panchina? Est a nai ca in su mundu de su fubal a torrai gratzias non s’est mai connotu. Semplici fut erribau cun su Casteddu chi biat sempiri prus acanta sa serie B, at trabagliau, massimamenti in sa conca de is giogadoris e ce dd’at fata a sarvai sa scuadra chena problema perunu. Tocaiat a ddi torrai gratzias? Est sussediu s’istadi passada candu su Casteddu dd’at allonghiau su cuntratu po ocannu puru, iat a nai calencunu tifosu.
Imoi, po cussu chi si ligit, iat depiri erribai Walter Mazzarri, chi in Casteddu at finas giogau, candu fut piciocheddu e fut cumentzendu a s’amostai a su mundu de sa bocia.
Allenadori famau, bortas meda est partu unu prangi-prangi, ma est unu chi de fubal ndi cumprendit. Comenti allenadori at fatu calencuna cosa manna comenti sa promotzioni in serie A cun su Livorno e un’annu, partendu de cuindixi puntus a suta de su zeru, at sarvau sa Reggina de sa serie B. A pustis at allenau scuadras mannas e famadas che sa Sampdoria, su Napoli, s’Inter, su Watford e su Torinu. Non sempiri at lassau arregodus bonus, ma a ddu castiai de foras est unu chi scit ita fairi.
Dispragit meda po Lionardu Semplici, ca at tentu unu pagu de malasorti, ma in Casteddu at fatu biri ca cun seriedadi e gana de fairi si podit erribai aunia serbit. S’urtimu fueddu at essi sempiri de su campu…
Màuru Mura
“Attività realizzata col contributo della Regione Sardegna – IMPRENTAS 2020-2021 LR 22/2018, art. 22”.
Foto: https://biografieonline.it/biografia-walter-mazzarri
