“Bogliu beni a-i custa citadi. Soi un’architetu, non unu chi betat ciumentu. E tengiu fidi manna in su trabagliu de sa magistradura”. Aici scrit in is social Stevini Boeri, presidente de sa Triennale, postu in mesu in s’indagu in pissu de s’urbanistica chi est ponendu in disacatu mannu su Cumunu de Milanu.

Boeri at scritu unu post longu aunia spiegat de essiri stetiu postu in mesu: “Ant fueddau mali de mimi, massimamenti candu s’ascurtant is fueddus mius chi tocat a biri beni meda. Su pesu est ca totu custu dd’ant donau a innantis a is giornalis o a is televisionis. Ma depiant lompiri prima a mei e a is abogaus mius. No est aici chi si fait, ma in Italia no est sa borta de unu chi sussedit. Non si faint is processus in is giornalis ca, a bortas, finas chi unu non tenit curpas benit inderetura cundennau.

Su babbu mannu de su “Bosco verticale”, chi est finas su meri de su probetu de sa Via Roma noa in Castedud, narat ca in custas dis at decidiu de nai sa sua poita: “Mi ndi soi acatau ca a abarrai a sa citia est peus poita totu benit castiau cun duda e benit cumprendiu agliu po cipudda. Est finas a nai ca in calencunu ‘media’, is messagius mius ddus ant ascurtaus comenti boliant issus, in manera chi deu benia postu in lugi mala. Totu po donai una pensada a sa vida mia, giai personali e giaia professionali”.

E s’amelessu a su sindigu de sa citadi meneghina, Sala? “Non fut un’amelessu, ma invecias unu agitoriu po cussu chi fait sa Cumisssioni Paesagiu de su Cumunu, chi sighiat a bullai su progetu de ‘Terre Botaniche’, ponendu in duda is arregioni chi non teniant nudda de eita biri cun is chistionis de sa matessi Cumissioni. Aciungiu ca su progetu nostu po via Pirelli 39, a pustis un’annu de atobius e finas calencunu certu, ddu ant aprovau cun sa rinuncia a sa pensada de is arreiginis de ‘Torre Botanica’, chi est un’architetura sperimentali a sa cali fui acapiau meda e chi iat airi donau a Milanu fama ancora prus manna, in Italia e in s’orrestu de su mundu”.

 

 

 

 

 

Màuru Mura

 

 

 

Cenarba su binticincu de triulas de su 2025

 

 

Attività realizzata col contributo della Regione Sardegna – Imprentas 2024-2025. Legge Regionale 22/2018

 

 

Ativadi apariciada cun s’agiudu de sa Regioni Sardigna – Imprentas 2024-2025. Lei Regionali 22/2018

 

 

Foto: https://www.avvenire.it/agora/pagine/stefano-boeri-bosco-verticale-citta-foresta-intervista