De su primu de làmpadas sa Sardigna, paris a su Molise e a su Friuli, at a intrai in zona bianca, ma sempiri donendu atentzioni a is regulas. In custu cambiu de colori s’at a podiri bessiri finas in su noti e totu is atividadis si podint oberri chena aspetai is datas giai assentadas de su decretu de su guvernu Draghi.
Funt custus is arresurtaus de s’acordiu intru de is presidentis de is Regionis, chi teniant comenti de rapresenatanti Massimiliano Fedriga, cun su ministru de sa Saludi Robertu Speranza. A s’atobiu ddue furint finas Giuanni Rezza, chi est diretori generali de sa Preventzioni e Sirviu Brusaferro, presidenti de s’Istitutu Superiori de sanidadi.
Abarrant is regulas chi beni connosceus: mascherina, stesiamentu, fentanas obertas in is logus serraus.
Nudda de fairi po is discotecas, chi abarrant serradas finas in zona bianca. IS guvernadoris iant pediu de ddas torrai a oberri cun su green pass, fendu is matessis cosas de is cojas e de is atras festas religiosas, ma su ministeru, po imoi, at nau ca nou.
A pustis de Sardigna, Molise e Friuli ant intrai in zona bianca, sa cida insegus, su Veneto, sa Liguria, s’Abruzzo e s’Umbria. Poi a bellu a bellu totu is atras e a s’acabu de làmpadas totu s’Italia iat a depiri “libera”.
“Soi cuntentu meda de s’acordiu cun is regionis e cun s’Iss. Cumprendeus, a dogna manera chi non depeus abasciai s’atentzioni” at nau su ministru Speranza.
Salvini si pigat is meritus de custu acordiu: “Est passau cussu chi ant sempiri nau sa Lega e is guvernadoris de dogna logu: is regionis chi diventant biancas de sa cida ch’intrat ant a oberri. Prus trabagliu po totus, seus passaus de is fueddus a sa realtadi”.
In su fratempus in Sardigna eris eus tentu trintacuatru impestaus nous e cuatru mortus, numurus prus bascius de una pariga de cidas a oi, ma tocat sempiri a donai crobba manna.
Màuru Mura
“Attività realizzata col contributo della Regione Sardegna – IMPRENTAS 2020-2021 LR 22/2018, art. 22”.
Foto: https://it.wikipedia.org/wiki/Roberto_Speranza
