A innantis totus citius e dapoi totus a batiri is manus in su stadiu de is Marmus de Carrara po arregodai a Gigi Riva prima de sa partida intru de sa Carrarese e sa Torres. Ma totu custu non de aunia funt is tifosus sassaresus. Difatis calencunu de custus s’est stesiau intru su minutu de arregodu po Rombo di Tuono. Totu est contau de is giassus de internet toscanus chi ant sighiu sa partida e sa cosa at fatu chistionai, massimamenti in is social. Est a nai ca sardus medas funt a morrungius cun is sassaresus, ma est finas de nai ca sa curpa de una pariga de tifosus non podit imboddiai totu una citadi. Sassari est prena, in parti manna, de genti chi at prantu a Riva e ddu arregodant cun fieresa finas oi. Difatis finas sa sociedadi de sa Torres iat umperau fueddus durcis a pustis sa morti de su campioni mannu de su Casteddu e de sa Natzionali italiana: “Sa Torres est a su costau de su dolu de su mundu de su fubalu po sa morti de Gigi Riva, eroi de su fubalu natzionali e de totu s’orrestu. Un’esempiu mannu chi at sempiri amostau in campu e, massimamenti, foras”. Atru esempiu est cussu de su Torino Club Sardegna Granata de Sassari chi est lompiu in Casteddu, cenarba passada in sa partida binta de su Torinu, cun dus striscionis. In su de unu ddue fut scritu: “Adiosu campioni Gigi Riva, pasadi in pagi” e in s’atru in manera crara: “Ciao Giggirriva”.

Duncas, po mori de cuatru sciolloriaus, non tocat a fairi de totu un’erba una fascina. Genti strollica si nd’agatat apetotu e is tifosus sassaresus non funt totus de aici. Antzis, torraus a nai, in custas dis de disacatu si funt amostaus tristus e acanta de unu campioni chi no at mai stagliau a nemus e antzis at fraigau pontis. Si sbagliat, ma est giustu su perdonu.

A dogna manera, su Deus de su fubalu, custa manera de fairi de cuatru scimprotus, dd’at punia chena farta ca si ndi funt torraus in domu insoru cun cincu gol in buciaca. Ma aici depiat acabbai, ca non si depint sciustigai is gespis.

 

 

Màuru Mura

 

 

 

Lunis, su bintinoi de gennargiu de su 2024

 

 

 

Attività realizzata col contributo della Regione Sardegna – Imprentas 2023-2024. Legge Regionale 22/2018

 

 

Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018

 

 

Foto: https://www.facebook.com/photo?fbid=10227600320406692&set=a.1039117771299