Unu de is premius prus mannus chi sa Germania donat est andau a unu magistrau militari italianu: Marco De Paolis. Poita? Po mori de airi fatu cundennai sessanta criminalis de guerra nazistas po is peus mortorius, de Marzabotto a Cefalonia, de genti cumuna e de militaris italianus, in sa segunda guerra mondiali. Non si ddu aspetaiat su magistrau, ma est stetiu cuntentu meda.
“Calencunu si podit pregontai: “Ma comenti, sa Germania donat unu premiu a unu magistrau chi at cundennau militaris tedescus?’. Eja, naraus nosu, poita a palas de custu s’agatat un’omini chi ponit totu s’impignu po sa giustitzia de annus meda a imoi, chena dda cunfundiri cun sa vindita, ma feti po fairi su propriu doveri”, custus funt is fueddus sabius de s’ambasciadori tedescu Viktor Elbling candu at premiau Depaolis cun l’“Ordine al Merito della Repubblica Federale di Germania”.
S’ambascaidori at arregodau is indagus de su magistrau: “Nd’at fatu cuasi cincuxentus e funt dixiotu is processus po is criminis prus mannus de is tedescus in Italia, cun centu e centu mortus in Marzabotto, Sant’Anna di Stazzema, San Terenzo, Vinca, Fivizzano, Civitella in Valdichiana, Vallucciole, Stia, Monchio, Padule di Fucecchio po erribai finas a is militaris bocius in Cefalonia, in sa Grecia”.
Indagus chi, bortas meda, funt acabaus cun sa cundenna de is nazistas. De custus, est a nai, nemus at mai fatu presoni in Germania.
Su magistrau Marco De Paolis at nau: “Soi cuntentu e onorau, prus comenti de citadinu italianu che comenti de magistrau militari. Intreghendu bint’annus a custus indagus apu tentu sa possibilidadi de bisitai prus de cincuanta citadis tedescas. E mi pregontaia sempiri cun cali faci rapresentaia un’istitutzioni chi po cincuant’annus no iat fatu nudda”, pensendu a is problemas chi at tentu in is indagus.
Màuru Mura
“Attività realizzata col contributo della Regione Sardegna – IMPRENTAS 2020-2021 LR 22/2018, art. 22”.
Foto: https://www.viaggiatoriignoranti.it/2017/12/la-strage-di-marzabotto.html
