Funt 4.147 is impestaus nous de su coronavirus in Italia in s’urtimu cumpudu, po is numurus chi donat su ministeru de sa Saludi. Sa dì innanti furint 3.937. Po cantu pertocat is mortus, invecias, funt 171, cincuanta in prus de mercuris.

Est de tempus meda chi non donaus is numurus italianus e sa curiosidadi est cussa de sciri cantu impestaus e mortus eus tentu de su mesi de friargiu de su 2020: Su ministeru donat custus numurus dì po dì de un’annu a custa parti: seus erribaus a 4.205.970 impestaus e a 125.793 mortus. Numurus spantosus, ma chi imoi funt calendu sempiri de prus. Cussus chi, invecias, ndi funt bessius beni funt 3.826.984, e feti, in s’urtimu bulletinu natzionali, 10.808. In is terapias intensivas de totu s’Italia si ddue agatant in 1.206 ca eriseru ndi funt bessius in setantadus.

In Sardigna in s’urtimu bulletinu regionali ddue agataus numurus sempiri prus bascius chi assimbigliant a cussus chi teniaus candu in totu s’Italia fut pesta prena, est a nai in is mesis de martzu e arbili de ocannu passau: 28 impestau e tres mortus.

De su cumentzu de sa pesta in s’Isula eus tentu 56.539 impestaus cun 1.456 mortus. Totu custus impestaus funt aici dividius in su territoriu: 14.791 in sa citadi metropolitana de Casteddu, 8.622 in su Sud Sardigna, 5.149 in sa provincia de Aristanis, 10.835 in cussa de Nugoro e 17.128 in sa provincia de Tatari.

Imoi is numurus funt prus bascius meda de is cidas passadas e sa spera de totu sa genti est chi custa borta siat a beru acabau totu. Non seus orrosciri de ddu nai: seus nosu chi feus andai a innanti dogna cosa e po cussu tocat a sighiri po unu bonu pagu cussu chi nos ant sempiri nau, mascherina, pulitzia e stesiamentu. Tocat a tenni un’atru pagu de passientzia, ca custa pesta est maladita, ma cumentzat a si biri unu pagu de lugi.

 

 

Màuru Mura

 

 

 

 

“Attività realizzata col contributo della Regione Sardegna – IMPRENTAS 2020-2021 LR 22/2018, art. 22”.

 

 

 

Foto: https://www.corriere.it/salute/21_maggio_27/coronavirus-italia-bollettino-oggi-27-maggio-4147-nuovi-casi-171-morti-e12472b4-bed6-11eb-ba33-0cbbda981d05.shtml