De oi finas in Sardigna po intrai in logus serraus comenti tzilleris, ristorantis, piscinas, palestras, cinemas e tiatrus serbit su green pass.

Is primus chi ant a cumpudai chi totu andit beni ant essi de seguru is meris de tzilleris e ristorantis. “At andai totu beni e totus ant a sighiri is regulas de su guvernu – narat Nigola Murru, diretori de sa Confesercenti de Casteddu –. Tocat a ddu fairi, poita est sa manera po abarrai obertus e sighiri a trabagliai e finas po cumbinciri sa genti a si vacinai. Nos arriolat meda totu comenti s’erriscu de depiri pagai multas o de serrai”.

Po chini non sighit is regulas is multas partint de 400 eurus e is meris de is butegas erriscant de serrai po dexi dis.

Una de is cosas chi fait fueddai meda est sa chistioni de chini depit cumpudai: “Est unu machiori chi nosi bengiat pediu finas custu, non teneus una divisa in pissu – narat unu meri de tzilleri –. Depeus giai sighiri atras milli cosas po mori de custa pesta e seus cichendu de andai a innantis su matessi”.

In su fratempus in Sardigna su bulletinu regionali de is impestaus faiat a timiri: giumpaus is cincuxentus un’atra borta. Difatis de eriseru, in sa terra nosta, teneus 522 impestaus nous cun sa percentuali, intru de is tamponis fatus, chi erribat cuasi a su 15%. A dolu mannu tocat a donai finas sa nova mala de atrus cuatru mortus: un’omini de 73 annus, un’atru de 88 e duas feminas, una de 80 annus e s’atra de 74.

Incungiaus in domu s’agatant in ses mila e abarrat oguali su numuru de chini, invecias, est a intru de is spidalis.

Is impestaus funt massimamenti in sa citadi metropolitana de Casteddu ca eriseru, de nous, ndi contaiat 338, unu spantu de averas. Su Sud Sardigna nd’at contau 122 e Tatari invecias 52, meda prus stesiadas Nugoro cun 3 e Aristanis cun 7.

Bieus chi cun su green pass at a mudai calencuna cosa.

 

 

Màuru Mura

 

 

 

“Attività realizzata col contributo della Regione Sardegna – IMPRENTAS 2020-2021 LR 22/2018, art. 22”.

 

 

 

 

Foto: https://www.altroconsumo.it/vita-privata-famiglia/viaggi-tempo-libero/news/green-pass-covid