Robert Fico, su presidenti de sa Slovachia, s’est torrau a amostai in dd’unu videu a pustis chi una bintina de dis a oi ddu iant lantaiu a corpus de pistola. At nau ca a intru de cidas pagas at a torrai a trabbagliai. Su Primu Ministru, cun dd’unu messagiu in Facebook at finas nau de airi perdonau chini at sparau, ma si dd’at finas pigada cun s’opositzioni, incurpendudedda de essiri “ambasciadora de su mali”.
Fut su cuindixi de maju candu a Fico dd’ant sparau cincu pistoletadas in sa bentri. A umperai sa pistola, in su mentri chi su Presidenti saludaiat sa genti in Handlova fut stetiu Jurah Cintula chi, in segus, iat nau de airi sparau poita non fut de acordiu cun is politigas de su guvernu. Po cantu si connoscit immoi Cintula s’agatat in dd’unu spidali po “macus”.
In su videu, chi durat catodixi minutus, Fico s’amostat setziu in dd’una cadira e parit prus langiu meda de a innantis. Su premier, chi sighit is politigas de sa Russia, at fatu sciri ca chi andat totu comenti depit andai at a torrai a trabbagliai intru s’acabbu de custu mesi e su cumentzu de triulas.
“Su cuindixi de maju, unu chi est a intru de s’opositzioni a su Guvernu at cicau de mi bociri po mori de is pensadas mias – narat Fico in su videu chi si lamat ‘Perdonu e avertimentu’ – non tengiu odiu cunfroma a chini m’at sparau, ma non tengiu arregioni de creiri chi est un’atacu feti de unu macu a sa sola”. “Est lompia s’ora de fairi su passu de unu: a perdonai”, narat Fico chi narat finas de non bolli nudda e de non at a denunciai a Cintula: “A s’acabbu est craru chi est stetiu feti unu ambasciadori de su mali e de s’odiu politigu de s’opositzioni”, at nau Fico incurpendu giornalis e televisionis chi funt contras de su Guvernu, partidus politigus contras e ong.
“S’atacu m’at postu in arriolu po sa saludi e apu sunfriu meda”, acabat de nai su Premier slovacu”.
Màuru Mura
Giobia, su ses de làmpadas de su 2024
Attività realizzata col contributo della Regione Sardegna – Imprentas 2023-2024. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://www.eunews.it/2024/06/06/fico-slovacchia-attentato-video-attacco/
