Parit unu bisu, invecias est sa beridadi. Is curridoris italianus bincint sa finali de sa stafeta 4×100 in is Olimpiadis de Tokyo. S’allirgat sa Sardigna puru: s’oristanesu Larentu Patta, su curridori de originis sardas Filipu Tortu, Faustu Desalu e Marcell Jacobs bincint sa medaglia de oru, a pustis una cursa de macus, indenanti a sa Gran Bretagna e a su Canada.

Su tempus de sa cursa est de cussus spantosus: 37”50, cun Tortu chi pariat bolendu in s’urtimu tretu, fendu biri totu cussu chi balit e sa gana chi teniat a intru de binciri. Bravu meda finas Patta e mannus Jacobs, chi iat giai bintu sa finali de is centu metrus, e Desalu.

“De seguru no est s’annu de is inglesus – at nau Tortu –. A parti is brullas, is inglesus funt cussus chi eus sempiri castiau po pigai esempiu. Custa borta seus nosu a pigai is cumplimentus insoru”.

Imoi is medaglias de oru de is italianus funt bessias a dexi, ma a spantai funt aberu cussas bintas in sa cursa, pareus torraus a is tempus de Perdu Mennea!

In su web, a pustis sa vitoria, si ligint post de allirghia, a cumentzai de cussu de sa Fidal, sa Federatzioni italiana de atletica leggera: “Campionis olimpicus! S’impresa de is impresas”, si ligit. “Bravus medas, soi allirga po issus e po s’Italia”, scrit, invecias, Pàula, sa mamma de Filipu Tortu, su curridori cun su babbu de Tempio.

“Est dificili, po mei, agatai is fueddus, soi allirga meda – at aciuntu sa mamma de Tortu, chi at bidu sa finali cun s’atru figliu Giacomo, in sa domu chi tenint in Sardigna – no agatu unu fueddu giustu”.

“De non creiri, at nau su presidenti Christian Solinas, una vitoria chi portat in Sardigna una medaglia de oru chi nos fait onori mannu indenanti de totu su mundu. Seus orgoglius de bosatrus e bosi aspetaus innoi po festai. Un’imbrassu a sa strinta e bosi torraus gratzias”.

 

 

Màuru Mura

 

 

“Attività realizzata col contributo della Regione Sardegna – IMPRENTAS 2020-2021 LR 22/2018, art. 22”.

 

 

Foto: https://www.ilsussidiario.net/news/jacobs-tortu-diretta-finale-staffetta-4x100m-olimpiadi-streaming-video-e-tv-nuovo-record-per-litalia/2205629/