Urtima cida cun is mascherinas in logus obertus. A pustis su parrer de su Cts, chi iat postu duas arregionis po ndi fairi orruiri s’obrigu de umperai sa mascherina, est erribau su cumandu de su ministru a sa saludi Robertu Speranza. De lunis, 28 de lampadas, candu finas sa Valle d’Aosta at a saludai sa zona groga, totu s’Italia at a lassai s’obrigu se lassai in buciaca sa mascherina candu s’abarrat in foras.

“De su 28 de lampadas giumpaus s’obrigu chi teniaus de nosi ponni sa mascherina in logus obertus in zona arva, ma sempiri donendu atentzioni a is indicus chi nosi donant su Cts”, at scritu su ministru in Facebook.

“Mascherinas chi depint essiri umperadas, a dogna manera, ogna borta chi, aunia seus, ddu at genti meda totu paris”, arregodant in su Cts, “comenti in is mercaus in is fieras o fendu sa fila in calechisiat logu”. Sempiri su Cts arrecumandat su umperu po chini sunfrit de atras maladias e candu nos agatuas in trenu o in sa corriera e finas in is spidalis.

Su Cts at agatau s’acordiu cun su ministeru a pustis un’atobiu de duas oras. De seguru at contau meda sa percentuali de vacinus fatus in Italia, chi po s’ora bit su 53% de sa genti cun sonumancu unu vacinu fatu e su 27%, invecias, chi at fatu su de dus.

Abarrat imoi un’atra chistioni aunia nemus at donau su parre: candu ant a podiri torrai a oberri is discotecas? Est chistioni de importu e facili est chi de custu si ndi fueddit sa cida chi benit. Parit seguru chi si possat intrai feti cun su green pass e feti in logus obertus, abarrat su nû de ita fairi de sa mascherina una borta intradus.

“In dogna logu si faint festas. Chi non si donant una dì segura po torrai a oberi a intru de is primas dis de triulas, torraus is permissus chi teneus e nosi poneus nosu puru a trabagliai chena regulas. Chi addurant a nosi ascurtai, tirendunosì atras dexi dis de trabagliu in triulas, nosi custringint a non torrai a partiri”, morrungiat su presidenti de su Sib, su sindacau de chini tenit aposentus po baddai.

Is numurus de sa pesta sighint a essiri prus pagus tostaus: eriseru in Italia 495 impestaus nous e 21 mortus, in Sardigna cuatru impestaus e mancunu mortu. Atentzioni, a dogna modu, ca in sa terra nosta dus de custus cuatru funt de duas atras variantis: unu Delta in su Policlinicu de Pauli e unu de sa varianti brasiliana in Casteddu.

 

 

 

Màuru Mura

 

 

“Attività realizzata col contributo della Regione Sardegna – IMPRENTAS 2020-2021 LR 22/2018, art. 22”.

 

 

Foto: https:// www.doveecomemicuro.it