In su mentris chi si cumentzat a biri sa scuadra de su governu nou, non dimininuint is fueddus intru de Giorgia Meloni cun Sirviu Berlusconi.
Sa Premier, galu non uficiali, de su capu de Fortza Italia est stetia batiada in d’unu billetu cun fueddus chi podint fairi cumprendiri ca tra is dus no andant de acordiu. “Chi si creit, prepotenti, arroganti e offensiva” aici si ligit in sa punta de billetu chi totu is media ant amostau. Sa meloni, ca est una “tzerpi” e scit ita arrespundiri, chistionendu cun is giornalistas at nau ca ndi mancat unu, de importu mannu intru cussu billeteddu: “Nemus mi podit ricatai”.
E chi de una parti Ignatziu La Russa, presidenti nou de su Senau, narat ca Berlusconi “depit nai a totus” chi cussu scritu “funt fartzus, ddu depit nai issu, non ddu possu nai deu” de s’atra campana est craru ca intru de Berlusconi e sa Meloni calencunu fueddu si dda depint nai.
Ma sa leader de Fradis d’Italia in custas ora est totu pigada cun is nominis de is ministrus nous e is primus funt cussu de su leghista Guanni Francu Giorgetti a s’Economia e Antoni Tajani, de Fortza Italia a is Esterus. Perunu puntu in prus, ma sempiri oguali, sa pensada de ponni a su Viminali su prefetu Mateu Piantedosi. Su favoressiu a sa Difesa, po immoi, parit su nomini de Adorfu Urso, omini de Fradis d’Italia. Atrus nominis chi girant funt cussu de Guidu Crosetto a su Sviluppo Economico e po sottosegretariu a sa presidentzia de su Consigliu cussu de Giuannibastista Fazzolari.
E Salvini? De cantu sù at giai nau ca iat bolli sa cadira de ministru de is Infrastruture: “Soi prontu. Sciu giai ita fairi e creu chi candu fui a su Viminali, nd’apu donau is provas”.
“Si pongiat s’animu e su coru in pagi: seus innoi p ondi pesai sa Natzioni. At essi unu caminu dificili, ma eus a donai totus su prus chi podeus”, at scritu sa Meloni in Facebook.
Màuru Mura
Lunis su 17 de Santu Aine de su 2022
“Attività realizzata col contributo della Regione Sardegna – IMPRENTAS 2021-2022 LR 22/2018, art. 22
Foto: https://www.alessandriaoggi.info/sito/2022/10/15/meloni-al-berlusca-non-sono-ricattabile-ma-la-lega-non-puo-dire-la-stessa-cosa-e-alessandria-oggi-lo-aveva-reso-noto-piu-di-quattro-anni-fa-con-un-video-del-grande-gigi-moncalvo-v/
