Is impestaus funt sempiri de mancu e sa Regioni si podit nai ca no est prus in perigulu, ma sa sanidadi sarda est sempiri a unu puntu mortu e chena oraganizatzioni. Est cussu chi narat su caputruma de is Progressistas in sa Regioni, Franciscu Agus, chi at scritu sa sua in pissu a cussu chi bit in is spidalis e massimamenti in su pronto soccorso. “Chini bivit in Sardigna podit, giustamenti, andai a su mari, a tiatru, a ristoranti e a giogai a bocia, ma non si podint permitiri de s’amalaidai”, at scritu, sighendu a pustis: “Sa gestioni de sa sanidadi, e in manera particolari s’emergentzia est ancora comenti fut in su coru de sa pesta”. E sa ripresa, sempiri po Agus, “at a benni ind’una situatzioni de pagu seguresa e po responsabilidadi totu de s’Ats”.
Difatis, arregodat: “Esistit unu progetu po ammanniai s’aposentu aunia s’aspetat de su Pronto Scoccorso de su spidali po permitiri, duncas, de stesiai cussus impestaus de su Covid de totu is atrus. Ats c’at postu mesis intreus po ddu fairi, andenduru feti su 25 de maju passau a su Cumunu de Casteddu, a sa Regioni e a sa Sopraintendenza po is permissus chi serbint. E de tandu non si scit prus nudda!”. “A custu puntu, sighit sempiri Agus, is trabaglius ddus ant cumandai in triulas po ddus fairi in cabidanni. Prus de totu, cun custa situatzioni giai sempiri peus nos at lassau chena fueddus cussu chi at nau su presidenti de sa Regioni Solinas de bolliri fairi un’atru puntu de sanidadi intru de mesu de Sant’Elia e sa Fiera, in Casteddu. Sempiri is solitas pensadas de su presidenti, chena progetu e chena dinari, in ses mesis non ce dd’ant fata a ammanniai un’aposentu e imoi bolint fairi creiri a is sardus de ndi pesai unu spidali de nudda. Mancu mali ca a totu custus dannus, invecias si agatant dotori e infermieiris chi si faint in cuatru po totus. Custa est sa genti chi mi pragit”.
Màuru Mura
“Attività realizzata col contributo della Regione Sardegna – IMPRENTAS 2020-2021 LR 22/2018, art. 22
Foto: https://www.youtube.com/watch?v=d2zwhZIEv5A&ab_channel=FrancescoAgus
