Su Vaticanu at pediu a su guvernu italianu de mudai cussu chi at scritu in su ddl Zan. Antzis at fatu de prus: torraideddu a iscriri ca aici coment’est andat contras ai cussu chi narat s’acordiu chi teneis cun nosu (Concordato), e ponit a erriscu sa libertadi de sa Cresia catolica.
Sa nova erribat propriu in su mesi de su Pride: non fut mai sussediu chi sa citadi de su Vaticanu chistionaiat de s’acordiu fatu s’11 de friargiu de su 1929, intru de sa Cresia cun su Stadu italianu tandu cumandau de is fascistas, po fairi cambiai una lei italiana. In sa litara chi Richard Gallagher, su diplomaticu de su vaticanu, at mandau a su ministru Luisu Di Maio, si ligit ca sa cresia timit, cun custas regulas noas, “de non podiri fairi in lebertadi cussu chi depit fairi sa Cresia”. “Bosi pedeus de tenni contu de s’arriolu nostu”, si ligit a s’acabu de sa litara.
S’arriolu mannu de sa Cresia est s’articulu 7 de su ddl chi narat ca finas is scolas privadas, cumandadas prus che a totu de predis e de mongias” depint festai, comenti a totus, sa “Giornata nazionale contro l’omofobia” chi at essi posta su 7 de maju.
In pissu de sa chistioni cras at a nai sa sua su presidenti Mariu Draghi: “Apessi in Parlamentu totu sa dì, apetu chi mi ddu pedant e apa arrespundiri in manera crara. Est una pregunta de importu mannu”.
Su Partidu Democratigu cun is Steddaus difendint sa lei finas chi su segretariu Erricu Letta narat ca si ndi podit chistionai: “Seus prontus a ascurtai, ma seus segurus ca custa est una lei de civiltadi”.
“Provaus a ascurtai cussu chi tenint de nai, poita no est arriolau feti su mundu de sa Cresia”, narant de Italia Viva. Non podint mancai is fueddus de Salvini: “In pissu de su ddl Zan soi prontu a m’atobiai cun Letta fians cras”.
Cussus prus arriolaus de totus funt is sotzius de su Lgtb, comenti depit essiri. Nosu seus de sa parti insoru.
Màuru Mura
“Attività realizzata col contributo della Regione Sardegna – IMPRENTAS 2020-2021 LR 22/2018, art. 22
Foto: https://it.wikipedia.org/wiki/LGBT
