Est lompia. Oi est sa dì de su Casteddu. O sonumancu dda depit essiri. A is otu e mesu de merì si giogat meda, chi non totu, in sa partida contras de su Bari. Un’atra borta su Bari comenti cussu doxi de arbili de su 1970. Tandu ci furint Riva, Domenghini e Nenè cun Albertosi. Oi is piciocus cun sa magligedda orrubia e asula, funt Lapadula, Nandez e Mancosu cun Radunovic. Est totu un’atra musica. Tandu si giogaiant su scudettu. Su primu e su solu de su Casteddu. Oi, invecias, si giogant sa Serie A. Is giannas de su Paradisu. Est mudau totu de cussu 1970. Feti una cosa est abarrada: s’amori de sa genti sarda po su Casteddu. Ca est a nai, no est feti de is casteddaius, ma de dogna omini o femina chi tenit sa Sardigna in su coru. Non c’at perun’atra bandela. Totus cun su coru ant essi cun is piciocus de Ranieri e cun s’allenadori etotu. Ddu tenint in is intragnas s’allenadori romanu: tifosus e genti cumuna. E non podit essiri atra cosa. Su sardu si nd’acatat inderetura de chini ddu cogliunat. Calencuna borta parit ca ddi pragit a essiri cogliunau. Ma Claudiu Ranieri no est unu chi cogliunat. Candu fueddat totus si citint. Benit ascurtau, a sa becesa ddi calant is lambrigas. Est un’omini. Aici est in is pensamentus de sa genti sarda.
Candu est lompiu in s’Isula, a pustis airi lassau arregodus durcis che su meli, timiat. Timiat de ndi sciusciai totu cussu chi de bonu iat fatu in su tempus passau. Invecias at bintu fintzas custa scumissa. Mai unu fueddu mali nau. Sempiri “signori”, candu at bintu e candu at perdiu. Immoi totus s’apicigant a Claudiu, chi, donai atentzioni, no at impromintiu nudda. No est in sa carena sua. At impromintiu feti una cosa: trabagliu.
E Claudiu at fatu unu trabagliu mannu fendu torrai a acostai, e a bisai, totu is tifosus. Serbit un’atru passigeddu. Eis a biri ca sa faina de Ranieri cun s’Isula at acabbai beni. Fortza Casteddu.
Màuru Mura
Giobia, s’otu de làmpadas de su 2023
Foto: https://www.dazn.com/it-IT/news/serie-b/quanto-guadagna-claudio-ranieri-al-cagliari/1ctp75n4yvs6j1b7w9zlxeo6xj
