Su campionau de Serie A est galu longu meda po cumentzai a s’arriolai e a prangiri, ma unu cumentzu aici legiu non ddu iat pensau nemus de averas.

Funt is numurus a ddu nai e, a pustis su paregiu de cenarba cun su Venetzia e is tres puntus de sa Salernitana cun su Genoa, su Casteddu s’agatat urtimu in sa classifica, cun feti tres puntus, e sa sola scuadra chi ancora no at bintu una partida. Cun seixi gol pigaus tenit finsas sa difesa peus de totu sa serie A.

Totu custu cun cuatru partidas, de is seti fatas, in domu e cun scuadras chi tenint nudda de prus de su Casteddu: feti dus puntus, in s’Unipol Domus (nomini prus legiu non si podiat agatai!), cun Spetzia, Genoa, Empoli e Venetzia!

Po tres bortas is sardus ant segnau po primus, ma is atrus ant sempiri recuperau: cun sa Latziu de 1-2 a 2-2, cun su Genoa de 2-0 a 3-2 e cun su Venetzia de 1-0 a 1-1.

Difesa chi tenit giogadoris cuasi becius e duncas chi ancora non funt intraus in forma. Centrucampu aunia feti Marin e Nandez cicant de produsiri e atacu chi in is urtimas tres partidas a bidu Joao Pedro chi gherrat ma non fait nudda de prus.

S’obietivu de si sarvai non comenti ocannu passau parit dificili, ma est a nai puru ca is piciocus de Mazzarri funt meda prus fortis de atras scuadras. Feti ca tocat a ponni a un’ala sa timoria e a cumentzai a giogai cun barra e gana. Imoi su campionau si frimat ca depit giogai s’Italia e candu torrat a partiri su Casteddu s’agatat un’atra partida in domu, cun sa Sampdoria de D’Aversa: tocat a mudai sa manera de calai in campu!

Funt pagus is giogadoris de su Casteddu chi ant chistionau a pustis sa partida de cenarba cun su Venetzia. Ddu ant fatu in is social, Nandez at scritu: “Non teneus ora de nosi ponni a prangiri, feti cun su trabagliu e cun s’agiudu de bosatrus tifosus ce dda eus a fairi”.

 

 

Màuru Mura

 

 

 

“Attività realizzata col contributo della Regione Sardegna – IMPRENTAS 2020-2021 LR 22/2018, art. 22”.

 

 

 

Foto: https://www.tuttocagliari.net/news/serie-a-la-classifica-aggiornata-napoli-capolista-a-punteggio-pieno-cagliari-ultimo-in-solitaria-40948