Cun cussa de eris, in Ferrara cun sa Spal, immoi funt cincu is partidas bintas de sighiu de sa Torres. A pustis cussas de su mesi de friargiu cun sa Lucchese (0-2), su Perugia (1-0), su Pontedera (1-2) e cussa de s’atra dì cun su Pescara (4-1), finas sa Spal est orruta a suta de is corpus de is sassaresus. Est a nai puru ca su Cesena, chi cumandat sa classifica at perdiu, a pustis tempus meda, cun sa Carrarese e immoi est a tesu, “feti” de noi puntus. Funt medas de averas, ma a sa Torres non costat nudda a bisai. Cussa de eris fut partida dificili ca is ferraresus lompiant de cincu partidas aunia iant fatu undigi puntus. Ma ocannu a is torresinus parit chi andit totu beni.
A su cumentzu de sa partida sa Spal est partia forti e dapoi de cincu minutus est andada acanta acanta de fairi gol. Ma una parada spantosa de Zaccagno, su piciocu chi at finas bintu su scudetu de is giovunus cun su Torinu”, si ddu at negau.Sa Torres non s’est atacada po nudda e prus de una bia at amelessau su portieri de sa Spal, massimamenti cun Diakite e Ruocco. A dogna manera sa prima parti de partida est acabbada po 0-0.
In sa parti de dus sa Torres, si biat inderetura, at cumprendiu ca podiat binciri sa partida e difatis a pustis unu cuartu de ora unu grandu gol de Fischnaller at incanalau s’arresurtau po is piciocus de Greco. De tandu, a innantis de fairi su gol de dus cun Zecca, feti una bia sa Spal at fatu a timiri: a su minutu de setantunu Rabbi, faci a faci cun Zaccagno, c’at fuliau a foras sa bocia chi podiat balliri su paregiu.
A pustis custa giorronada, ca fut cussa de 30, sa classifica bit, comenti eus giai nau a su cumentzu, su Cesena a 74 puntus, sighit sa Torres a 65 chi est stesiada de 9 puntus de sa Carrarese e de 13 de su Perugia.
Dominigu is sassaresus giogant in domu contras de sa Virtus Entella, chi est a 37 puntus, ma eris at bintu cun su Perugia spantosamenti po 5-0. Non parit partita facili, ma ocannu sa Torres nos at abituau beni.
Màuru Mura
Giobia, su seti de martzu de su 2024
Attività realizzata col contributo della Regione Sardegna – Imprentas 2023-2024. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://www.youtube.com/watch?v=2WxRR4n6IWs
