Est stetiu s’urtimu giogadori comporau, cussu prus disigliau massimamenti po cussu chi at amostau ocannu passau. Giuanni Luca Gaetano immoi est torrau in Casteddu, sempiri prestau de su Napoli ma cun sa possibilidadi manna de ddu comporai in totu, et est prontu a si ponni un’atra borta in pissu sa magligedda de su Casteddu.
“Funt stetius dus mesis dificilis: apu aspetau a longu e finas de conca non fut facili, ma, cussu chi contat, est chi immoi soi innoi”, is fueddus cun is calis si presentat un’atra bia a sa genti de su Casteddu, a pustis airi giogau de friargiu a maju de su campionau passau. “No apu mai pensau de non torrai a lompiri in Casteddu: torru gratzias a sa sociedadi, a su presidenti Giulini, a su diretori Bonato. E torru gratzias massimamenti a totu sa genti de su Casteddu po totu cussu chi m’ant donau, benei a nosi sustenni dominigu in sa Unipol Domus”.
Sa borta de duas de Gaetano chi at a giogai contras de su Napoli (dominigu a is ses de merì). “At essi una partida bella, dificili e tostada”, narat su giogadori nou de is sardus. “Po mimi at essi una partida de spantu ca apa giogai contras de sa scuadra de sa citadi aunia soi nasciu e sa scuadra chi tengiu in su coru”.
A dirigiri sa partida intru de Casteddu e Napoli, chi est sa de cuatru in custu campionau de Serie A at essi s’arbitru Fideli La Penna de sa setzioni de Roma 1. S’arbitru romanu at essi agiudau de is castialinias Baccini e Rossi, s’arbitru de foras campu at essi Rapuano e a sighiri sa partida po su Vara nt essi Paterna e Massa.
Fideli La Penna, chi tenit corantun’annus de idadi e po immoi at cumandau setantunu bortas in sa Serie A at arbitrau su Casteddu po seti bias in su campionau mannu. Cun La Penna comenti de arbitru su Casteddu at bintu po duas bortas perdiu po cuatru e paregiau po una bia. S’urtima partida de La Penna cun su Casteddu est stetia cussa perdia, in su campionau de ocannu passau, cun su Milan, in domu, po 3-1.
Màuru Mura
Giobia, su dogi de cabidanni de su 2024
Attività realizzata col contributo della Regione Sardegna – Imprentas 2023-2024. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://sport.virgilio.it/chi-e-larbitro-la-penna-di-roma-1-118008
