Fut una dì legia in totu s’Italia, s’abba ndi calaiat a marigas apetotu e sa nebida fut de segai a fitas, cussu cuatru de maju de su 1949. S’aparechiu de su Torinu, scuadra de fubal famada in totu su mundu, ndi fut torrendu de Lisbona. Iat giogau una partida cun su Benfica po torrai onoris a capitan Ferreira, giogadori chi acabaiat de si dda gherrai in campu.

 

Depiat erribai in s’aeroportu de Torinu a mericeddu ca teniat atras partidas de fairi in su campionau chi fut bincendu. Antzis fut giai bintu! Fut su de cincu scudetus, unu in fatu de s’atru, chi cussa scuadra binciat e, in Italia e in su mundu funt totu ispantaus de is capassidadis de cussu giogadoris. Totu su mundu connosciat cussa scuadra  comenti de “Grande Torino”. Po cicai de nai cali fut sa mannaria de su Torinu bastit a nai ca s’agetivu “Grande” non si dd’ant donau a pustis de Superga, comenti si podit pensai, ma in su mentris chi binciat. Iat fatu bisai is italianus cussa scuadra fata de ominis balentis.

 

No est mai erribau aunia depiat cussu aparechiu, est abarrau in su cielu aunia s’agatant cussus piciocus, ma in terra ant lassau un’arrasta manna in sa carena de totu is tifosus italianus, e de medissimus sardus puru, poita cussa fut sa scuadra de totus.

 

De tandu non si contant is libburus chi funt bessius po cicai de contai cussus giogadoris, comenti puru is cantzonis, is poesias e is film.

 

Arregodaus is piciocus, chi ancora funt in su coru de chinechisiat, ligenduru is nominis: Valerio Bacigalupo, Aldo Ballarin, Dino Ballarin, Émile Bongiorni, Eusebio Castigliano, Rubens Fadini, Guglielmo Gabetto, Ruggero Grava, Giuseppe Grezar, Ezio Loik, Virgilio Maroso, Danilo Martelli, Valentino Mazzola, Romeo Menti, Piero Operto, Franco Ossola, Mario Rigamonti, Július Schubert.

 

Atrus tempus, atrus ominis chi non c’intrant nudda cun cussu chi seus bivendu oi: est una paristoria de contai ancora a is pipius a innanti de si dromiri comenti atrus contus de foghile.

 

 

Màuru Mura

 

 

“Attività realizzata col contributo della Regione Sardegna – IMPRENTAS 2021-2022 LR 22/2018, art. 22”

 

 

Foto: https://www.stopandgoal.net/2016/05/04/prima-pagina/la-leggenda-degli-immortali-il-grande-torino/