Dì de ses de guerra intru de is Stadus Unidus e Israele contras de s’Iran. In su noti si funt ingrugiaus is missilis de Teheran e su Stadu de is ebreus. In su mentris bessit a pigliu sa nova, a dogna manera cun nemus chi narat ca giai, ca is trumas curdas de s’Iraq iant a podiri cumentzai un’atzioni in terra contras de is militzias iranianas.
Timoria massimamenti po cantu pertocat su lompimentu de sa guerra in Europa: eris unu missili de s’Iran, chi depiat erribbai in s’isula de Cipro, at deviau sa mirada bia sa Turchia e sa Nato dd’at abatiu. Su presidenti francesu Emmanuel Macron at fueddau po telefunu cun su presidenti de is Stadus Unidus Donald Trump e finas cun su capu de Israele Netanyahu, a is calis at pediu de si frimai.
Fait fueddai meda finas su certu intru de sa Spagna cun sempiri is Stadus Udidus de America, a pustis chi su presidenti Sanchez at negau is basis militaris. Po mori de custu de sa Domu Arva amelessant dogna frimamentu de relata cumerciali.
Po cantu pertocat invecias s’Italia, sa presidenti Meloni at fatu sciri ca “at a mandai agiudus de difesa a is natzionis de su Gulfu”, ma, ponit in craru sa Meloni “non seus in guerra e non ddue boleus imbucai. E po is basis italianas at nau ca po s’ora non si connoscit perunu pedimentu ma chi iat depiri lompiri “at essi cumpetentzia de su Guvernu decidiri o no un’umperu prus mannu, ma deu pensa ca ddu depeus decidiri paris a totu su Parlamentu”.
