S’arregorta de is firmas po su referendum in pissu de sa cannabis est andada comenti nemus s’aspetaiat: cincucentumila firmas erribadas in d’una cida chi permitit a su comitatu de bisai su referendum in su beranu de ocannu chi benit. C’at tempus finas a su 30 de custu mesi po cicai prus firmas, ca non si scit mai ca sa Cassatzioni ddas depit controllai e calencuna, podit essiri, non bagliat. Custa est sa prima arregorta de is firmas chi in Italia s’est tenta online in su giassu referendumcannabis.it.

Dd’at aprontada prus de unu sotziu: Sotziu Luca Coscioni, Meglio Legale, Forum Droghe, Società della Ragione, Antigone. In mesu finas is partidus +Europa, Possibile e radicali italiani.

Po chini dd’at aprontada est un’arresurtau “mannu ma chi non spantat meda. Est de tempus meda chi serbit una lei po sa cannabis e cun sa firma digitali, in pagas dis, sa chistioni at tentu cussu chi nos aspetiaus”.

E in su mentris chi calencunu, in pissu de totus Pippo Civati, chistionat de comenti su Partidu Democratigu siat  abarrau citiu in sa chistioni, Emma Bonino fueddat de “una di de importu mannu, non feti po chini at aprontau, ma, prus che a totu, po totu is citadinus”.

Inchietu Mauritziu Gasparri: “No ant essi totu custas firmas a frimai sa bataglia nosta po sa vida e contras sa droga liberta. Totu is italianus connoscint is erriscus chi si currint e non ant a donai su votu po custu referendum de macus. In chistionis de saludi, de corpus e de conca, tocat a non ci pensai prus de tanti. Eus fairi fueddai chini si drogaiat e nd’est bessiu o finas mammas e babbus chi ant perdiu is figlius po curpa de custa pesta”.

Imoi tocat a biri candu at essi su referendum e a votai, comenti de sempiri, non cun s’entiri ma cun sa conca, poita est a biri is arregionis de chini at aprontau totu e de chini, invecias, bolit lassai is cosas comenti funt.

 

 

Màuru Mura

 

 

 

“Attività realizzata col contributo della Regione Sardegna – IMPRENTAS 2020-2021 LR 22/2018, art. 22”.

 

 

 

Foto:  https://www.monzatoday.it/attualita/comi-ex-drogato-contro-cannabis-libera.html