Funt medas is portieris fortis chi su Casteddu at tentu. Partenduru de Albertosi, chi est stetiu su meglius de totus, passendu po Vecchi e Copparoni, finas a erribai a Marchetti cun Cragno.
Unu de is prus mannus est chena peruna duda Robertu Corti, nasciu in Treviglio su 28 de Santu Aine de su 1952. A pustis airi giogau cun sa Trevigliese e cun su Sorrento, in s’istadi de su 1976 lompit in Casteddu, chi tandu giogaiat in Serie B. A su cumentzu si dividiat sa porta cun Arrenatu Copparoni, su portieri sardu famau po airi parau, po primu in Italia, unu rigori a Maradona candu giogaiat in su Torinu. Ma de su campionau 1978-79 Corti diventat su meri de sa porta de su Casteddu e donat una grandu manu de agiudu po erribai in Serie A cuss’annu e totu. Giogat, duncas, in Serie A, po sa prima borta in su campionau 1979-80 e ddu fait cun sabidoria manna ca teniat totu is numurus de grandu portieri. Fut su portieri de cussa difesa chi biat comenti de tertzinus Lamagni e Longobucco, cun Canestrari e Brugnera in su centru. Abarrat in Sardigna finas a su campionau 1981-82 e s’annu infatu andat a giogai po s’Udinese. Feti un’annu abarrat in Friuli ca s’annu a coa ddu comporat s’Ascoli, aunia abarrat po cinc’annus, cuatru passaus in Serie A e unu in Serie B.
Serrat comenti de giogadori cun sa Cavese in Serie C2 in su 1989, a pustis airi giogau po 154 bortas in Serie A. Cun su Casteddu est calau in campu po 153 bortas e po 137 nd’at boddiu sa bocia de sa porta!
Sempiri candu giogaiat in Sardigna at giogau una partida, in Genova contras de sa Germania Ovest B, cun sa Natzionali Italiana B.
Acabau de giogai at cumentzau a trabagliai comenti de allenadori e preparadori de portieris. Partenduru de su Lecce at allenau is portieris finas de sa Salernitana, su Casteddu, su Palermo, su Parma, s’Ascoli e sa Massese. In su 2008 fut su numuru dus de sa panchina de su Gallipoli e in su 2010 de cussa de su Verona.
Màuru Mura
“Attività realizzata col contributo della Regione Sardegna – IMPRENTAS 2020-2021 LR 22/2018, art. 22”.
Foto: https://it.wikipedia.org/wiki/Roberto_Corti
