Su Rt in Sardigna calat a suta de s’1 e sa spera est de passai de zona orrubia a cussa de colori arangiu, andant meglius finas is numurus de is ispidalis, ma funt crescendu is zonas aunia su Covid si spainat. Su 26 in Italia s’at cumentzai a oberri is atividadis, ma de seguru non in Sardigna. Naraus ca si sciat giai, ma ddu at nau finas s’assessori de sa Saludi Mariu Nieddu, chi tenit fidi po su mudamentu de su colori po sa Sardigna: iat essi un’atru passu chi, imoi comenti de imoi, iat andai beni.
“Spereus de passai de sa zona orrubia a cussa arangiu, parit ca is numurus ddu iant nai, tocat feti a tenni fidi e aspetai cussu chi decidit su ministru de sa saludi”, at nau s’assessori.
Oi regionis medas de s’Italia iant depiri torrai in sa zona groga e de lunis torrant a biviri meglius de cussu chi funt fendu. In Sardigna po si pigai unu cafeu e po prandiri o cenai foras de domu si depit aspetai, sonumancu, finas a su 3 de maiu.
In su fratempus sighit s’indagu de sa Regioni cun sa campagna “Sardi e sicuri”. Cras, sabudu 24 de arbili, s’acabat in su tataresu. Ant essi bintiseti is biddas cumpudadas: Tula, Nule, Su Burgu, Siligo, Illorai, Cossoine, Nughedu Santu Nigola, Ardara, Erula, Putifigari, Botida, Padria, Mara, Banari, Romana, Giave, Bultzi, Itireddu, Martis, Cheremule, Bessude, Isporlatu, Boruta, Semestene, Monteleone, Muros e Carzeghe.
S’indagu, in custa biddas, cumentzat a is otu e mesu de mengianu finas a sa una e torrat a partiri a is duas e acabat a is ses de merì. Bastat a portai sa tessera sanitaria.
Arregodaus ca in Sardigna, po s’ora, eus tentu 52.644 (303 eriseru) impestaus e 1.337 mortus (9 eriseru) e aici funt dividius in s’Isula: 13.653 in sa citadi metropolitana de Casteddu, 7.970 in su Sud Sardigna, 4.601 in sa provincia de Aristanis, 10.346 in cussa de Nugoro e is atrus 16.074 in sa provincia de Tatari.
Màuru Mura
“
Attività realizzata col contributo della Regione Sardegna – IMPRENTAS 2020-2021 LR 22/2018, art. 22
Foto: https://comune.assemini.ca.it/articolo/sardi-sicuri-assemini-27-28-marzo-2021
