Eis bistu? Teniaus arregioni nosu a non perdiri sa spera! Allirghia manna de totu is sardus, ca su Casteddu est sa scuadra de sa Sardigna non feti de cussus chi bivint in sa capitali sarda, po sa partida de eriseru cun s’Udinese, binta po 1-0 cun su rigore segnau de Joao Pedro. Imoi sa classifica si fait unu pagu prus belligedda ca sa “Serie A” est feti a tres puntus, aunia s’agatant su Torinu (chi, a dogna manera est giustu arregodai, tenit una partida de mancu, finas chi dificili meda cun sa Lazio) e su Benevento. Is atras scuadras puru non funt aici atesu comenti podit parrir: Fiorentina, Spezia e Genoa funt a cincu puntus de su Casteddu! Imoi mancant feti ses partidas e su Casteddu ce dda podit fairi a si sarvai, a pustis, est a nai, unu campionau de suferentzia manna.
Ses puntus in duas partidas serbint a si dda gherrai finas a sa fini, imoi erribant duas partidas unu pagheddu prus dificilis cun sa Roma, in Casteddu, e cun su Napoli, ma coemnti eus sempiri nau sa scuadra de Semplici tenit totu is fortzas po si ddas giogai chena de timiri: tocat feti a tenni conca e gana! Sa Roma non fait a timiri po nudda, ca dominigu at a tenni sa conca prus a sa partida de Manchester po sa Europa League e at a passillai in Casteddu. Su Napoli est unu pagu posta meglius, ma sa bocia est tunda e non si scit mai cussu chi podit capitai, bastit a pensai a su Benevento chi est andau a binciri cun sa Juventus. Dominigu, castiendu is partidas de is scuadras in is orus de su Casteddu, podit essiri una bella dì: su Torinu si dda giogat cun su Napoli chi tenit bisongiu de puntus po intrai in Champion’s, su Benevento cun s’Udinese chi non podit prus perdiri, sa Fiorentina cun sa Juventus, chi tenit bisongiu de puntus po su matessi obietivu de su Napoli, e Genoa e Spezia si atobiant tra cussas.
Scumiteis ca su Casteddu at essi a su costau de su Torinu cun is propius puntus?
Màuru Mura
“Attività realizzata col contributo della Regione Sardegna – IMPRENTAS 2020-2021 LR 22/2018, art. 22
Foto: https://www.youtube.com/watch?v=YkVLRbXTPyc
