Patada, de su 26 de mesi de talamini de su 2020 est ghiada, po sa borta de duas, de su sindigu Angilu Sini. S’agatat a un’artaria, in pissu de su livellu de su mari, de 778 metrus. Est duncas, cunfroma a sa morfologia de sa Sardigna una bidda de monti. Contat, po una cica de su 30 de Sant’Andria de ocannu passau, giai 2828 bividoris chi si cumpartzint unu sartu comunali mannu po cuasi 165 chilometrus cuadraus. Intru de is poderis chi tenit ddue est finas cussu de sa fratzioni de Bantine e lacanat cun is territorius comunalis de Benetutti, Buddusò, Bultei, Nughedu Santu Nigolò, Nule, Oschiri, Osidda e Otzieri. Santa Sabina est sa sua santa amparadora chi festat, in donnia, su 29 de austu. Su nomini de Patada est famau in Sardigna, massimamenti, po sa resolza e po s’orrestu de is gorteddus. De sempiri calechisiat gorteddu, difati, in Sardigna benit lamau sa Patadesa.
A intru de bellesas mannas naturalisticas de sa regioni de su Monteacuto, in su territoriu patadesu si ddue agatat su lagu Lerno, chi est una risorsa idrica finas po is biddas lacanantis e chi pigat su nomini de su monti chi si ddue agatat in pissu, est a nai su Monti Lerno chi cun is 1094 metrus in pissu de su livellu de su mari est su puntu prus artu de totu su sartu. Atru monti de importu, de su sartu de Patada, est cussu de Santu Baingiu de su cali s’amostant is territorius de su sassaresu, de sa Gaddura e de bona parti de sa Barbagia. Connota meda est finas s’abba de is funtanas massimamenti po essiri lebia e po puresa. Famada in s’ingiriu de sa zona est sa funtana de Su Cucuru.
Po cussu chi naraiat su linguista tedescu Max Leopold Wagner, su nomini Patada iat essi riferiu a sa positzioni geografica de sa bidda e iat a tenni su significu de pranuartu, giai umperau in tempus a innantis de is romanus. Custa pensada dd’at cumpartzia finas su professori nugoresu Massimu Pittau chi abarraiat de sa matessi idea ma cojaiat sa teoria de su professori Virgiliu Tetti po su cali su fueddu Patada fut de arreiginis latinas e iat essi su participiu de su verbu sardu Pactiare chi bolit nai “ponni in paris”. Difatis is becius in is primus annus de su seculu passau, naraiant a is giovunus chi su fueddu lompiat de su fueddu Patto. Sa zona prus in basciu fut su paris de prus de seti villagius, intru de custus cussus de Bantine e Bunne. A sighiu de alluvionis e rdorrobamentus is capus de is villagius iant tentu sa pensada de si ponni totu paris e cicai unu logu prus seguru po su biviu nou. E su sceberu fut orrutu in su logu aunia s’agatat oi Patada. Su solu villagiu a non si ponni paris fudi stetiu Bantine, ca oi puru abarrada unu centru po contu propriu.
Màuru Mura
Giobia, su dus de gennargiu de su 2025
Attività realizzata col contributo della Regione Sardegna – Imprentas 2024-2025. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2024-2025. Lei Regionali 22/2018
Foto: https://www.sardegnaturismo.it/it/esplora/pattada
