Su Casteddu non si frimat prus: tres partidas e noi puntus! Cussa chi, finas a una cida, pariat una classifica de disisperu imoi est una classifica chi podit allirgai su coru. Su Parma cun su Crotone funt cuasi seguras ca ocannu chi benit ant a giogai in serie B, tocat a biri cali at essi sca scuadra chi ddis facat cumpangia, si dd’ant giogai, in custa coa, sa Fiorentina, su Spezia, su Torino su Benevento e is piciocus de Semplici.
Eriseru, in d’una partida chi de giogu nd’at bistu pagu su Casteddu at bintu, sunfrendu comenti fut giustu, cun sa Roma de Fonseca: 3-2 s’arresurtau cun gol totu strangius: su grecu Lykogiannis, su rumenu Marin e su brasilianu Joao Pedro po su Casteddu e su spagnolu Perez e s’argentinu Fazio po sa Roma.
Tres puntus mannus po su Casteddu e a s’acabu de partida s’allenadori Lionardu Semplici at chistionau cun is giornalistas: “Eus fatu una bella partida, cun gana e barra, cussa chi dpiaus fairi contras de custa Roma chi non s’at arregalau nudda. Seus cuntentus meda de custas urtimas tres partidas, calencuna borta tocat a castiai is atras partidas puru, ma nosu sciaus ca totu fut in is manus nostas. Custa scuadra telit calidadis chi balint meda, finas a imoi no iat giogau comenti depiat. Imoi, is giogadoris, ant tirau a foras totu cussu chi teniant a intru e boliaus feti sa possibilidadi de nosi dda giogia cun totus, comenti est sussediu. Po s’ora no eus fatu ancora nudda, non depeus mollai imoi ca is puntus contant prus de sempiri”. Una manu de agiudu est stetia donada eriseru de s’Udinese chi est andada a binciri cun su Benevento e, chena fairi is crobus, oi s’aspetant un’atru agiudu de su Napoli chi giogat cun su Torinu. Eus a benni abiri, ma po imoi de su disisperu prus mannu s’est passau a s’allirghia de si dda podiri gherrai.
Castiendu is partidas chi mancant a s’acabu de su campionau est facili a cumprendiri cali at essi cussa chi contat de prus, difatis tra duas cidas tocat a andai a Benevento in cussu chi parit, cun is ogus de oi, unu sparegiu!
Màuru Mura
“Attività realizzata col contributo della Regione Sardegna – IMPRENTAS 2020-2021 LR 22/2018, art. 22
Foto: https://www.youtube.com/watch?v=3kcdDjHDAfI
