Funt bint’annus de presoni, comenti iat pediu su pubricu ministeru Gaietanu Porcu, cussus chi s’ant pigau Joselito cun Michael Marras, babbu e figliu de cincuantatres e bintot’annus, incurpaus de airi bociu, su 9 de friargiu de ocannu passau in su sartu de Partiolla, is dus fradis calabresus Davidi e Massimilianu Mirabello de trintacincu e corant’annus. Feti a pustis dus mesis is corpus insoru funt stetius agataus. Cundennau a dus annus de presoni finas Stevini Mura, partiollesu de corantatres annus, po sa curpa de airi favoressiu is Marras.

Joselito Marras, una borta ascurtada sa sententzia, s’est postu a aboginai ca sa responsabilidadi fut sa sua e ca su figliu non c’intraiat nudda.

Po s’acusa is dus iant bociu is fradis Mirabello e a pustis c’iant fuliau is corpus in su padenti errischendu de ce ddus fairi papai de is sirbonis e de atrus animalis. Is fradis Mirabello certaiant de sighiu cun is Marras po chistionis de pascimentu e po mori de custu funt stetius bocius.

S’abogau de Joselito Marras, Maria Gratzia Monni, su martis de sa cida passada, a pustis airi chistionau po cuasi cuatr’oras, iat pediu de assolviri su babbu ca at bociu feti poita s’est difendiu e po totu is atras curpas iat pediu su minimu de sa pena. Invecias s’abogau Patritziu Rovelli, chi difendiat Michael Marras, iat pediu s’assolutzioni po totu poita Michael non iat fatu nudda.

Po su pm Porcu is Marras no ant bociu po si difendiri e s’arregioni de su mortoriu est de cicai in is certus po chistionis de terras aunia pasciri is animalis.

Giuannifrancu Piscitelli, abogau de sa familia de is dus fradis mortus at nau ca “is chistionis de is abogaus de is Marras non podaint essiri atras, ma ca non funt cussas chi si ligint in is paperis de su dibatimentu”.

In prus a Piscitelli, s’agataiant in aula finas is abogaus Sarbadori Sorbili e Antoneddu Spada chi funt sa parti civili po sa familia e po su sotziu Penelope, chi iat agiudau in sa cica de is dus fradis candu funt sparessius.

 

 

Màuru Mura

 

 

“Attività realizzata col contributo della Regione Sardegna – IMPRENTAS 2020-2021 LR 22/2018, art. 22”.

 

 

 

Foto: https://www.google.com/url?sa=i&url=https%3A%2F%2Fwww.change.org%2Fp%2Faldo-menga-togliere-dalle-aule-dei-tribunali-la-legge-e-uguale-per-tutti&psig=AOvVaw08hareFqAYbK_ZmzS12vzw&ust=1626946578235000&source=images&cd=vfe&ved=0CAgQjRxqFwoTCMCa0MLu8_ECFQAAAAAdAAAAABAD