Totu su mundu castiaiat sa citadi de Genova in su mesi de Triulas de su 2021. In sa capitali de sa Liguria si depiant atobiai is otu presidentis de is Stadus prus industrializaus. Genti meda e massimamenti sotzius non furint de acordiu cun is chistionis, ddue fut su mundu de sa Cresia paris a is ambientalistas, a is centrus socialis e a is movimentus anarco-insurrezionalisti. Totus boliant nai ca su mundu non depiat pigai cuss’andaledda e ca si depiant castiai de prus is diritus civilis e s’oguagliantza de sa genti.
A innantis de s’atobiu genovesu ddue furint stetias atras brigas mannas intru de sa genti chi manifestaiat e is fortzas de politzia. Sa manifestada prus famada, po custu, fut cussa de su 30 de Sant’Andria de su 1999 in Seattle. Atrus strobus mannus in is manifestadas de Davos, in su mesi de gennargiu de su 2001, in Napoli su 17 de martzu de su matessi annu e in Goteborg, po un’atobiu de is ominis chi cumandaiant in Europa, su 15 de làmpadas, sempiri de su 2001.
In Italia, su guvernu Berlusconi iat giurau s’11 de làmpadas e su numuru dus de cussu guvernu, Gianfranco Fini, fut unu chi non pragiat po nudda a is movimentus. Calencunu iat cicau de fairi chistionai is unus cun is atrus, ma non fut serbiu a nudda: dognunu abarraiat frimu in is pensamentus propius.
Sa prima impressioni est ca su scioberu de Genova po custu atobiu fut unu machiori, ca sa citadi non si prestaiat a sa seguresa po sa genti.
Su 19 de triulas, in sa manifestada po is diritus de is migrantis, andat totu beni. Cincuantamila personis chi manifestant in pagi, finas chi in is orus de sa Questura una truma de piciocus bestius de nieddu, is Black Bloc, cumentzant a tirai butiglias contras sa politzia e is carabineris. Funt is manifestantis e totu a ponni a un’ala custus delicuentis.
De sa dì a pustis, su 20, cumentzant is strobus po totus cun is carrigas de politziotus, carabineris e finantzieris chi scudint is personis chena piedadi peruna, ma su peus depit ancora erribai e erribat a merì cun sa morti de Carlo Giuliani, bociu de unu corpu de pistola in su mentris chi fut tirendu un’estintori a una machina de carabineris cun genti a intru. Est sa scintidda chi non serbiat a nemus e de tandu in sus is incidentis s’acapiant unu a s’atru. Cussu chi at spantau de prus fut ca is militaris si dda pigaiant prus cun sa genti chi manifestaiat in pagi invecias de cicai de frimai is Black Bloc chi funt cumentzendu a sciasciai totu cussu chi agataiant.
Sa dì infatu, su 21, cun tristura manna po sa morti de Giuliani, torrant a calai in is prassas totu is sotzius chi andaiant contras is “potentis” de su mundu e sussedint atrus incidentis. S’Italia, a is ogus de su mundu, est cun is palas a su muru. Ma miga acabat gasi: in su noti is militaris intrant in sa scola Diaz aunia dromiant is manifestantis e scudint a totus chena cicai de scedai is bonus de is malus. Nd’acapiant 93, ma sa dì infatu funt giai foras de presoni ca non teniant a ita biri cun peruna curpa. Passant una pariga de dis e si connoscint finas is torturas a intru de sa caserma de Bolzaneto, atru contu de lassai totu su mundu spantau.
Est su 7 de arbili de su 2015 candu sa Corte Europea dei Diritti dell’Uomo, cun totu is giuigis de acordiu, at nau, chena atacai nudda, ca “che in quei giorni sono state compiute gravi violazioni all’articolo 3 sul divieto di tortura e di atti inumani o degradanti”.
Una pagina de storia italiana prena de bregungia po totus su Stadu.
Màuru Mura
“Attività realizzata col contributo della Regione Sardegna – IMPRENTAS 2020-2021 LR 22/2018, art. 22”.
Foto: https://www.rainews.it/dl/rainews/media/I-giorni-di-Genova-speciale-di-Rainews24-G8-2001-bc5ea6a2-4b74-4872-b318-f463cc6c8563.html
