De su 1985 a su 1990 at portau cun onori mannu sa maglia de su Casteddu lassendu un’arrasta manna e arregodus durcis in su coru de is tifosus. Lucio Bernardini at scritu paginas de importu in pissu de su libburu de sa storia de su Casteddu.

Est nasciu in Citta di Castello su 21 de cabidanni de su 1990 e inigui at cumentzau a giogai a fubal in Serie D. In su 1978 ddu comporat s’Avellino, chi tandu s’agataiat in Serie A, ma cun is irpinus at fatu in tempus a giogai feti cun is giovunus. De Avellino torrat a domu sua e in su 1980 passat a su Perugia, aunia giogat is primas partidas in serie A in su campionau 1980-81. Abarrat cun su Perugia finas s’annu infatu in serie B e duncas ddu comporat sa Spal chi fut apena calada in Serie C. A pustis una bona pariga de campionaus de serie C, cun sa Spal, sa Rondinella e su Jesi, in su 1985 si torrat a incrarai in Serie B cun su Casteddu. Cun is sardus abarrat cinc’annus e bivit sa calada in Serie C e, de capitanu, is dus campionaus bintus in Serie C e in Serie B. Bestit sa maglia de su Casteddu po 167 bortas in totu e fait finas 16 gol, massimamenti de is undixi metrus, ca fut unu chi sciat tirai beni. Abarrat in is ogus cussu schema candu ndi pesaiat sa bocia po Cappioli, chi tiraiat poi in porta. In su noranta su Casteddu, po fairi posu a Matteoli, ddu bendit a s’Ascoli, sempiri in Serie B, e cun is marchigianus bincit un’atru campionau. Acabat de giogai in Serie C cun su Baracca Lugo.

Fut unu Casteddu poburu cussu chi at biviu Bernardini, ma non po custu legiu. De cussa scuadra chi in dus annus est bessia de sa Serie C a sa Serie A, cun Ranieri comenti de allenadori, fut unu de is giogadoris prus fortis e de cussus prus ascurtaus de is cumpangius. De seguru, in sa carriera sua, no at tentu sa gloria chi ddi minesciat, ma po Lucio s’importu prus mannu est a airi lassau arregodus bonus in dogna scuadra: in Casteddu ddu at fatu!

 

 

Màuru Mura

 

 

 

“Attività realizzata col contributo della Regione Sardegna – IMPRENTAS 2020-2021 LR 22/2018, art. 22”.

 

 

 

Foto: https://www.google.com/url?sa=i&url=https%3A%2F%2Fwww.ebay.it%2Fitm%2F161962559292&psig=AOvVaw3SfpUWGyeZeBPUYIPe2n8i&ust=1625745736733000&source=images&cd=vfe&ved=0CAcQjRxqFwoTCIj_xIP10PECFQAAAAAdAAAAABAD