Funt totu feminas, bellas e bravas, cussas chi cantant in su Coro Duennas de Biddanoa Monteleone. De una dexina de annus ddas sighit su maistu Andria Zinchiri, cun passioni e sacrificiu. Aprontant in su mesi de maju, in sa crésia de Nostra Sennora de Interrios una manifestada de corus feminilis. Maju e féminas faint pensai inderetura a sa Madonna: seguramenti no est una coincidéntzia chi ant decìdiu de fairi custu atóbiu própiu tandu.

Eus bófiu connòsciri de acanta custas féminas e Giovanna Roma, una de is primas a créiri in custu progetu, arrespundit cun sa gentilesa chi in custa bidda galana non mancat mai.

 

Giovanna, candu e comenti nascit su Coro Duennas?

In bidda tenimos cuasi a usàntzia a cantare in coro, oramai dae vint’annos esistit su coro de sos omines Coro de Iddanoa, sighìdu dae su mastru Pàulu Carta. Est issu chi nos at propostu de cantare S’atitu pro sa chida santa de su duamiza e chimbe. E dae tando amos comintzadu.

 

Duennas: ita bolit nai custu fueddu e poita ddu eis umperau?

Su nùmene est bessidu a pitzu tratende sa peràula duenda chi diat devet nàrrere in italianu “folletto”, po lu ponner a su plurale at giradu in duendas, e po lu adatare a modu nostru e fagher cumprender chi si tratat semper de féminas l’amos cambiadu in duennas… e nos piaghiat meda.

 

Eis inténdiu sa necessidadi de tènniri unu coru totu de féminas?

Nos est bénnidu naturale: esistiat dae degh’annos primu su coro de sos ómines.

 

Chini bos at trasmìtiu sa passioni po su cantu?

Medas de nois cantaimis in su coro de sa creja, a àteras lis piaghìat de si ponner a sa proa. Sa preséntzia de sos ómines forsi at dadu s’ispinta giusta po s’acultziare a su cantu.

 

Cantu bos impignat in-d-una cida?

Dogni chida proamos duas boltas, cando capitat calchi atobiu de importu puru tres!

 

Chini est su maistu de bosatrus?

Sende puru unu de sos fundadores de su coro cun Pàulu Carta, dae cando amos comintzadu amos dadu sa diretzione a su mastru Andria Zinchiri de ’Iddanoa. Cantat in su coro de sos ómines, at musicadu calchi poesia po issos e at iscritu po su coro de sas féminas su Babbu Nostru, un’Ave Maria in latinu, at musicadu una poesia de Salvatore Meloni, Chena pura, e una pregadoria chi oramai apartenit a sos cantos populares, cun su testu de Salvatore Cossu bortau in su 1800, S’Amabile Maria.

 

Abarrais in Biddanoa o besseis foras puru po cantai?

Cantamos in tota sa Sardigna, pagu tempus como semus andadas in Abruzzo e tenimos bidea de andare in Europa, ma no est fàtzile. Bi cheret dinari meda e finanziamentos chi como non arrivan pius.

 

Biddanoa Monteleone est sa terra de tiu Remundu Piras. Cantais caliguna cosa de custu poeta?

Cantamos una poesia chi at musicadu Andria Zinchiri pro su coro de ’Iddanoa, Su mese ‘e sas fadas e àteras musicadas dae Salvatore Rizzu, Gianni Sogos, chi oramai connoschen totu, comente A Biddanoa, Su piantu ‘e sas mamas, S’Eucarestia, Una mama ninnende. Totu meda bellas, chi cantadas dae sos ómines an unu significadu, puru in calidade de sonu de sas boghes, cantadas dae sas féminas nde tenen un’àteru, a boltas pius profundu. Chie leget sas peraulas e iscultat si rendet, deretu, contu de su valore de ambas versiones.

 

Cali funt is operas chi portais in palcu?

Cantamos totu sos cantos populares sardos e proponimos puru sas cantones nostras, totu su chi resessìmos a adatare a sas boghes de sas féminas, partinde dae cantos de Andrea Parodi, cantos a ballu, finas a sas cantones de sos Beatles. Non timimos de nos ponner a sa proa, difatis in su repertóriu tenimos pius de chentu cantones.

 

Cali funt is problemas prus mannus?

In-d-unu coro de féminas, sos problemas sun meda de pius a cunfrontu a sos ómines. Semus mamas, muzeres, fizas, cun sas delicadesas chi tenimos de afrontare in donzi situatzione, dae sas festas a sas cerimónias tristas e allegras. Sa fémina, in domo, est semper in prima lìnia e su fatu de apartènnere a unu coro est un’impignu mannu chi non si podet sighire semper cun costàntzia. A su comintzu amos tentu sos problemas de ogni coro, de cumprender comente si potat cantare cun boghes diversas. Sas primas boltas amos cantadu a tres boghes. poi amos impostadu sa cuarta ‘oghe e semus divisas in “soprano 1° e 2°, mezzi soprano e contralti”, non meda diversas dae s’impostatzione de sos ómines, divisos cun boghe, mesaoghe, contra e basciu.

 

A su coro s’acóstiant finas piciocas giovaneddas?

Cando amos comintzadu totu tenimis degh’annos de mancu. Tenimos su piaghere chi semus unu bellu grupu de féminas de ogni edade. Piseddas e féminas mannas chi si divertin a bistare umpare chena dificultades de zenìas.

 

Cali funt is progetus po su benidori?

Semus annos meda in bidea de registrare unu CD. Amos comintzadu e como devimos congruire su tribagliu, ma non resessimos ancora a agatare su tempus de organizare sa registrazione Amos musicadu una bella poesia, Chiguledda, de don Nenaldu Iddau, un’àteru poeta de ’Iddanoa. Como, si bi la faghimos, tenimos bidea de musicare àteras cantones suas.

 

 

Màuru Mura

 

 

“Attività realizzata col contributo della Regione Sardegna – IMPRENTAS 2020-2021 LR 22/2018, art. 22”.

 

 

Foto: Archivio Domus de Janas