Candu pigas unu gol a partida cuasi acabada su sabori de su meli, chi tenias in buca, mudat in feli. Custu est sussediu eriseru a su Casteddu! Fut bincendu una partida chi iat erriscau de perdiri chi in porta no iat tentu unu portieri chi at fatu miraculus unu in fatu de s’atru. Cragno, a innantis nd’iat bogau a foras sonumancu duas o tres bocias de sa porta e, a pustis sa segnadura de Joao Pedro, is tres puntus po su Casteddu pariant cosa fata. Eita est sussediu in segus? Pagu cosa de nai, unu sbagliu de Sottil chi no at sighiu Boga, s’atacanti de su Sassuolo, e su ciafu po is piciocus de Di Francesco est stetiu forti de averas. In custa situatzioni tocat a castiai sa tassa mesu prena ca a dda castiai mesu buida non fait beni. Sa cosa bona de custu dominigu de fubal est ca s’est pigau unu puntu, comenti non sussediat de diora meda. Atras cosas chi tocat a castiai funt ca sa distantzia s’est ammanniada cun is urtimas duas, Parma e Crotone, chi ant perdiu cun su Napoli e cun su Genoa, e s’est impiticada cun su Spetzia, chi at perdiu cun s’Udinese, e cun su Benevento, chi at perdiu cun s’Inter. Est beru ca si funt fuidas s’Udinese cun su Genoa, ma su campionau est ancora longu e cussus chi parint lepuris podint mudai in sissigorrus.

Su capitanu de su Casteddu Joao Pedro at chistionau cun is giornalistas e at nau custu fueddus: “Ddu sciaus de su cumentzu ca sa partida cun su Sassuolo iat essi stetia dificili meda, poita sa scuadra emiliana giogat beni e tenit calidadi manna. Iaus trabagliau beni a intru de sa cida passada po dda preparai beni custa partida e fustis acanta de binciri, iat at essi mudada sa classifica e ddu meritiaus. Seus una scuadra forti ma ddu depeus fairi biri in campu e non feti a fueddus. Sa partida oi dda eus fata, seus bius e teneus totus gana de batagliai, sunfrendu comenti si depit e abarrendu in partida. Depeus torrai a cumentzai de custu e, soi seguru, ndi eus a bessiri a foras de custa classifica legia”.

 

Màuru Mura

 

 

“Attività realizzata col contributo della Regione Sardegna – IMPRENTAS 2020-2021 LR 22/2018, art. 22”.

 

 

Foto:https://sport.sky.it/calcio/serie-a/2020/07/18/cagliari-sassuolo-risultato-gol