“Oi funt milli is dis de candu su guvernu est in carriga. A mei parint unu pagu de prus, ma funt milli. Unu tempus bastanti po amostai su caminu chi eus pigau e su trabbagliu fatu. Ma deu soi ancora prus tostada e sciu ca tocat a fairi de prus e finas meglius”. Aici Giorgia Meloni, chi s’agataiat in su Cungressu natzionali de sa Cisl in Roma, festat is “milli dis” de Guvernu.
“Cussu chi mi pragit de prus de custus, cuasi, tres annus de Guvernu est unu. In media, in dogna dì de custas milli dis funt stetius pesaus prus de milli postus de trabbaglius nous, e po sempiri, po, in totu, prus de unu milioni de trabbagliadoris nous”, aciungit sa presidenti de su Consigliu.
Po cantu pertocat is datzius americanus sa presidenti in carriga de su Consigliu at finas nau: “In custas dis su Guvernu miu est trabbagliendu po ponni a un’ala una guerra de cumerciu cun is Stadus Unidus, chi non tenit peruna pensada e iat a tocai massimamenti is trabbagliadoris. A sa sola non podeus fairi de prus e po custu tocat a cicai s’agiudu de is atras Natzionis e de sa Cumissioni Europea, chi tenit cumpetentzia in custu”.
A sa Meloni ant batiu is manus bortas medas, ca est craru s’agiudu a pari sa Cisl cun su Guvernu. In sa filera de unu de is cadiras finas Luisu Sbarra, chi in su mesi de friargiu iat erriciu sa bisita de sa Meloni comenti de segretariu natzionali, a innantis de s’amostai comenti de numuru dus de su ministeru de su Sud. Intru de sa genti meda chi si ddue agataiat finas su presidenti de su Senau Ignatziu La Russa e sa ministra de su Trabbagliu Ervida Calderone.
Sa presidenti de su Guvernu at impromintiu strumentus nous po favoressiri is cuntratus privaus e at postu in craru ca su “spread” est cussu chi scoviat comenti est andendu s’Italia: “Est a nai ca su ‘spread’, candu eus pigau poderi fut a 236 puntus e immoi s’agatat a 89”.
Màuru Mura
Cenarba su dixiotu de triulas de su 2025
Attività realizzata col contributo della Regione Sardegna – Imprentas 2024-2025. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2024-2025. Lei Regionali 22/2018
Foto: https://www.avvenire.it/attualita/pagine/meloni-alla-cisl
