A mengianu si podit torrai a pigai su cafeu in su bar e a ora de prandiri si podit andai in ristoranti. Massimamenti est aberu custa sa grandu diferentzia intru de zona arangiu e zona groga.  Su passagiu de colori contat meda po s’economia de is bar e ristorantis e po sa genti puru. Est a nai ca po is scolas is regulas, de zona arangiu e zona groga, funt cuasi sa matessi cosa: scola materna, elementari e medias abarrant, a dogna manera, obertas e in presentzia, invecias is studentis de is superioris abarrant a sighiri is letzionis in domu, in d’una percentuali chi podit cambiai de su 50 a su 75%. Atra cosa oguali intru de is dus coloris si podit agatai in is oras aunia si podit bessiri: in s’unu e in s’atru colori de is cincu de mengianu finas a is degi de merì.

Po is bar, is ristorantis, is pub, is gelaterias e is pasticerias invecias cambiat totu: candu ses de dolori grogu podis lassai obertu de is cincu de mengianu finas a is ses de merì e ndi podis leai cosa de papai o de bufai finas a is degi, de spaciai in foras; in zona arangiu cambiat totu e sa cosa de papai e de bufai si podit spaciai feti in foras. A cambiai de zona arangiu a zona groga cumbenit finas a chini trabagliat in is museus, ca si podint oberri de su lunis a su cenarba.

Comenti de dogna cida, s’ordinantzia de su ministru de sa saludi Speranza at a balliri de dominigu. Ancora non si scint is regionis chi ant a cambiai colori ma parit seguru ca in Toscana, Campania, provincia de Trento, Basilicata e Molisi ant a sighiri a abarrai de colori grogu. Est meda probabili, chi is numurus abarrant is proprius, chi s’aciungiant sa Calabria, s’Emilia-Romagna e su Veneto.

Ci funt  finas regionis che su Latzio, su Piemonti, sa Liguria, is Marche, su Friuli e s’Abruzzo chi funt de colori arangiu de su 15 de custu mesi e sa cida passada teniant numurus de regioni groga, chi est ancora aici est probabili chi cambint in grogu. Is atras regionis, Puglia, Umbria, Sardegna Sicilia e sa provincia de Bolzano ant essi de seguru ancora arangiu ca ancora non funt passadas duas cidas.

 

Màuru Mura

 

“Attività realizzata col contributo della Regione Sardegna – IMPRENTAS 2020-2021 LR 22/2018, art. 22”.

 

 

Foto: https://www.panorama.it/news/politica/regione-italia-area-gialla-arancione-rossa-dpcm-covid