Is numurus de su Covid
Apretu mannu in Burcei, aunia is impestaus funt bessius a trexi e aunia su sindgu, Simoni Monni amelessat regulas prus tostadas po sa genti: “Po cicai de non fairi bessiri is numurus de sa pesta – at scritu in Facebook – tocat a fairi is cosas beni fatas: s’umperu de sa mascherina sempiri e in dogna logu, su stesiamentu, su samunamentu de is manus e a non s’agatai in truma”. “Chi calencunu – aciungit Monni – bit de non s’intendiri beni, no intendit fragus e saboris o caglientura prus de 37,5, andit inderetura de su dotori de familia”.
In su fratempus su bulletinu regionali de eriseru naraiat ca in Sardigna teneus atrus 251 impestaus in pissu de 3.241 tamponis. Un’omini de otantacuatr’annus, chi biviat in sa citadi metropolitana de Casteddu, s’est mortu. Bessint de dexi cussus chi s’agatant in is spidalis e abarrat de bintidus su numuru de chini est in terapia intensiva. S’abasciat, invecias, su numuru de is incungiaus in domu: imoi funt 6.515.
In Italia eriseru atrus 5.636 impestaus e trintunu funt is mortus. Sempiri ogualis cussus chi s’agatant in is spidalis.
Chi sighint a abarrai custus numurus, pensant de su Cnr (Consiglio Nazionale delle Ricerche), est facili chi sa Sardigna in su giru de dixiaseti dis torrit in zona groga. Peus est posta sa Sicilia, in su matessi Cnr si pensat chi intrit in zona groga in su giru de dexi dis.
Funt numurus chi arriolant e tocat a sighiri sa vacinatzioni de totus, chena farta. In Sardigna, po imoi sa genti chi s’est vacinada est pagu prus pagu de sa metadi, su 52,7%, e sighendu aici feti a s’acabu de cabidanni o su cumentzu de mesi de talamini s’at a erribai a cussu numuru, s’80%, chi de sempiri est s’obietivu primariu.
Ancora est tropu sa genti chi tenit dudas, massimamenti po machioris, ma a dognunu chi creit in sa scentzia depit cicai de cunvinciri chini chi siat.
Màuru Mura
“Attività realizzata col contributo della Regione Sardegna – IMPRENTAS 2020-2021 LR 22/2018, art. 22”.
Foto: https://www.salute.gov.it/portale/nuovocoronavirus/dettaglioContenutiNuovoCoronavirus.jsp?lingua=italiano&id=5351&area=nuovoCoronavirus&menu=vuoto
