“Nudda est mudau de is bogis chi babbu intendiat in is annus de su Casteddu mannu, candu nosi lamaiant bandidus e pastoris”. Nigola Riva, su figliu de Gigi, sabudu s’agataiat in su stadiu intregau a Giusepu Meazza in Milanu po sa partida intru de sa scuadra de Nicola contras de is orrubiusnieddus de Conceicao. E aici cumentzat sa pensada de Nigola Riva po is bogis de is tifosus milanistas contras de is “nemigus” de s’Isula (“Eis a torrai in Serie Beee” cun su craru riferimentu a is brebeis) intru de sa partida acabbado po 1-1. Su minimu est ca, difatis, a is milanistas cussus fueddus ddis funt torraus in barras ca si creiant de binciri facili.
“Cumprendu cantu est basciu su livellu de is tifosus”, sighit a scriri Nigola Riva, chi est finas consiglieri de aministratzioni de sa sociedadi de su presidenti Giulini, “is tifosus de su Milan, po totu sa partida, ant cantau contras de s’Inter e strocendu is brebeis contras de nosu: chi fui unu ‘simpli’ tifosu de su Milan calncuna pregunta mi dda ia fairi”.
A innantis su giustu morrungiu de Riva e a pustis sa pensada: “Ia bolli nai una cosa, de sardu e de tifosu de su Casteddu: gratzias. Poita comenti candu eus bintu su scudetu in su 1970 ancora oi, in su 2025, finas chi cumprendeus ca sa Sardigna e Casteddu funt intru de is logus prus bellus aunia si possat biviri, e de arregodai logu de spantu po totu is turistas chi lompint de dogna parti de su mundu, cun custus fueddus non feis atru de alluiri sa passioni nosta, s’orgogliu e sa fieresa de unu populu”.
Dapoi, su matessi Riva, chistionat a chini fut aboginendu: “Tifosus stimaus, nosu de totu cussu chi bosatrus nosi aboginais ndi andaus orgogliosus poita totu su Casteddu, scuadra e tifosus candu calant in campu ddu faint po amostai sa fieresa de unu populu e sa storia sua. Po non chistionai de identidadi e cultura. Chi nosi boleis ofendiri non si tzerrieis pastoris, ma ‘costa smeraldinus’. Mirai, chi feis aici, ce dda podeis fairi”.
Màuru Mura
Lunis, su trexi de gennargiu de su 2025
Attività realizzata col contributo della Regione Sardegna – Imprentas 2024-2025. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2024-2025. Lei Regionali 22/2018
Foto: https://www.calciomercato.com/news/milan-anche-la-curva-sud-contro-pioli-dopo-il-derby-la-societa-s
